Ramazan – musylmandardyń ulyq merekesi. Bul aıda ıslam dinin ustanatyn barlyq halyq dástúrli túrde tań atqannan kún batqanǵa deıin ózin tamaqtan tııady. Bıylǵy ramazan aıyndaǵy ózgeristerge qatysty túsinikteme berip ketken S.Seıtbekov qasıetti Ramazan aıynyń erekshelikteri men oǵan mańǵystaýlyqtardyń daıyndyǵy týraly toqtaldy.
- Bıylǵy oraza aldyńǵy jylǵa qaraǵanda 10-11 kún erte keledi. 2019 jyly Ramazan aıy 6 mamyrda bastalyp, 4 maýsymǵa deıin jalǵasady, byltyr 29 kún aýyz bekitken bolsaq, bıyl 30 kún oraza ustaıtyn bolamyz. Qadir túni mamyrdyń 31 nen maýsymnyń 1-ne qaraǵan tún dep belgilendi. Bıylǵy pitir sadaqanyń eń az mólsheri ortasha eseppen 300 teńgeni quraıdy. Degenmen, adamdar belgilengen mólsherde qaıyrymdylyq jasaı almasa, onda olar shamasy kelgenshe sadaqa berýge de bolady. Al, bul qarajat jaǵdaıy joq adamdardyń da osy merekege daıyndalýy úshin meshitke nemese muqtaj jandardyń tikeleı ózine tapsyrylady. Alaıda, muqtaj jandarǵa aqsha emes, arpa, kúrish, qurma, un sekildi azyq-túlik berýge de bolady, deıdi Qazaqstan musylmandary dinı basqarmasynyń Mańǵystaý oblysy boıynsha ókil ımamy Smaıyl Súıerqululy.
Sonymen qatar, aýyzasharda ysyrapshyldyqqa jol bermeý kerek degen bas ımam:
- Qasıetti ramazan aıynda saýaby mol amaldyń biri – aýyzashar berý. Qazirgi tańda oblysymyzda ujym bolyp meshitte aýyzashar berý úrdiske aınalyp keledi. Aýzy berik jandy aýyzasharǵa shaqyryp tamaq bergen — oraza ustaǵan adamnyń alatynyndaı saýap alady. Aýzy berik adamnyń saýabynan da esh nárse kemimeıdi. Aýyzashar berýde eń bir este shyǵarmaýǵa tıisti erejemiz – ysyrap jasamaý. Ony jurtqa jarııa qylyp nemese bireýden ozyp, kisi aldynda maqtaný emes, oraza ustaǵan adamnyń saýabyn alý úshin shyn nıetpen berý. Qasıetti ramazan aıynda Alla razylyǵy úshin aýyz ashar bergende básekelestikke boı aldyrý óte qate amal. Aýyzasharda as ta tók tamaq qoıý mindet emes, - dedi ol.
