«Saryarqa» gaz qubyrynyń qurylysy Tuńǵysh Prezıdent – Elbasy N.Á.Nazarbaevtyń bastamasymen qolǵa alynǵany belgili. Gaz qubyry Qyzylorda – Jezqazǵan – Qaraǵandy – Temirtaý – Nur-Sultan baǵyty boıynsha ótedi. Osy baǵytta jylyna 2,2 mlrd tekshe metr kógildir otyn ótkizilýge tıis. Uzyndyǵy 1061 shaqyrymǵa teń. Joba 2 mıllıon 700 myń qazaqstandyqty gazben qamtamasyz etýge múmkindik beredi. Memlekettik mańyzǵa ıe qurylystyń barysyn Úkimet tikeleı qadaǵalap otyrǵanyn aıta keteıik.
Jaqynda Qyzylorda oblysyna jumys saparymen kelgen «Samuryq-Qazyna» UÁQ» AQ Basqarma tóraǵasy Ahmetjan Esimov Qyzylorda oblysynyń ákimi Qyrymbek Kósherbaev jáne «QazMunaıGaz» UK» AQ Basqarma tóraǵasy Alık Aıdarbaevpen birge CRC-1 dánekerleý keshenine baryp, «Saryarqa» magıstraldy gaz qubyrynyń qurylysyn kórdi.
– О́zderińizge belgili, Partııa Tóraǵasy Nur Otan partııasynyń kezekti HVIII sezinde halyqtyń áleýetin arttyryp, aýyldyq eldi mekenderdiń ınjenerlik jáne áleýmettik ınfraqurylymyn damytýǵa baǵyttalǵan birneshe partııalyq jobany júzege asyrýdy tapsyrdy. Sonyń biri – «Qutty meken» jobasy. Búgin joba aıasynda aımaqtyq partııa fılıalynyń partııalyq baqylaý komıssııasymen birge «Saryarqa» magıstraldy gaz qubyrynyń qurylys-montaj jumystaryna, memleket qarjysynyń nátıjeli jumsalýyna partııalyq baqylaý jasap, jumysshylardyń jaǵdaıymen tanystyq. Basty maqsat – Partııa Tóraǵasy, Tuńǵysh Prezıdentimizdiń bes áleýmettik bastamasynyń oryndalýyn qadaǵalaý. Árıne jobanyń óz deńgeıinde júrgizilip jatqany qýantady. Eń bastysy, joba iske qosylǵan ýaqytta qanshama otbasyn kógildir otynmen qamtyp qana qoımaı, soltústik óńirlerdegi ekologııany jaqsartatyny anyq. Muny ótken jyly osy magıstraldy gaz qubyry jobasyn júzege asyrýǵa tapsyrma bergen kezde Tuńǵysh Prezıdentimiz erekshe mańyz berip, atap ótken bolatyn, – dedi Ortalyq partııa apparaty partııalyq baqylaý qyzmetiniń ınspektory, «Qutty meken» partııalyq jobasynyń jetekshisi Nurlan Baımyrzaev.
Kúni búginge deıin Qazaqstannyń ortalyq aımaǵy negizinen kómir tutynyp keldi. Elordamyz Nur-Sultanǵa jolymyz túskende jelsiz kúnderi qalany kók tútin qushaǵyna alyp, ókpesin syǵyp turatynyn baıqaǵan edik. Kómir tútini ekologııalyq zardaptardy da kóbeıtedi. Endi ol qaýip seıilýge tıis. «Saryarqa» magıstraldy gaz qubyry elimizge osyndaı ıgilikterdi ákele jatyr.
