Al jýyrda Shotlandııa úkimetiniń 2021 jylǵa deıin jańa referendým ótkizý týraly uıǵarymyna ne túrtki boldy? Brıtandyq The Times basylymynda Shotlandııanyń Premer- mınıstri Nıkola Stıordjenniń referendýmǵa baılanysty jańa zańnyń 2019 jyldyń sońyna deıin qabyldanatyndyǵy týraly pikiri jarııalandy. Eger Ulybrıtanııa Eýrodaq quramynan shyǵar bolsa, shotlandyqtar parlamenttiń kelesi saılaýyna deıin Breksıt pen táýelsizdikke baılanysty tańdaýlaryn jasap úlgerýleri tıis. Bul – «Shotlandııanyń táýelsiz memleket retindegi ekonomıkalyq áleýetine baǵyttalǵan kampanııa» qurýǵa nıetti ultshyldardyń úmiti.
Bir qaraǵanda bul áli de bolsa Eýroodaqtan túbegeıli shyqpaǵan Ulybrıtanııaǵa qyr kórsetýdiń de amaly bolsa kerek. Bıyl 29 naýryz kúni odaqtan shyǵýdy kóksegen brıtandyqtar qazir belgili sebepterge baılanysty bul merzimdi qazan aıynyń sońyna deıin sozýǵa májbúr boldy. Eýroodaqtyń barlyq yrzyǵyn kórip otyrǵan Shotlandııa Breksıt sheshiminde óz eliniń múddeleri esepke alynbaı, pikirleriniń eskerýsiz qalǵandyǵyna nalıdy. Sondaı-aq Brıtanııa parlamenti basshylyqqa alatyn vestmınsterlik júıeniń buzylǵandyǵyna jáne Shotlandııaǵa sharapaty tımeı otyrǵandyǵyna qynjylady.
Sondyqtan da Nıkola Stıordjen basshylyq etetin ultshyldar partııasy táýelsiz, ekonomıkalyq qýatty memleket qurýdyń úgit-nasıhatynda aıanyp qalmaıtyn syqyldy.
Qalaı desek te, Shotlandııa Eýroodaqtyń quramynda qalǵandy qalaıdy. 2014 jylǵy referendýmda olar Ulybrıtanııadan táýelsizdik alǵan kúnde osy odaqtan lezde shyǵyp qalý qaýpi tóngendikten, táýelsizdikterin tárk etken bolatyn. Endi bul odaqtan Ulybrıtanııa shyǵar tusta, shotlandyqtar Eýropadaǵy áriptesteriniń janynda qalýǵa tyrysyp jatyr.
Úkimet basshysy Ulybrıtanııa quramynan shyǵý úderisiniń meılinshe «jumsaq» ótýin, onyń ishinde táýelsizdiktiń alǵashqy jyldarynda shyǵystardy qatań baqylaýǵa alyp, derbes valıýtaǵa kóshýdi kidirte turýdy kókseıdi. Biraq Shotlandııa úkimeti referendým shaqyrýǵa quzyrly bolmaǵandyqtan, bul iske saıası partııalar bel sheshe kiriskeli otyr.
