Aımaqtar • 07 Mamyr, 2019

Qaraǵandy vokzaly qaıta túleıdi

Qaraǵandy syndy alyp shahar úshin bir vokzaldyń azdyq etetini ám onyń tar ekeni kópten beri aıtylyp júrgen áńgime-tin. Kenshiler astanasynyń temir jol qaqpasynan táýligine 5 myńǵa jýyq adam ári-beri ótedi eken. Al vokzaldyń ishine bar bolǵany 800 adam ǵana syıady. Tarlyǵy óz aldyna, klassıkalyq stalındik ampır mánerinde salynǵan nysannyń búginde keteýi ketip, toza bastaǵany da ras. Mine, osy olqylyqtardy eskere kelip, «Qazaqstan temir joly» kompanııasy temir jol vokzalyn qaıta qurý týraly sheshim qabyldaǵan bolatyn. Joba ázir bolǵannan keıin, byltyr 1 tamyzda jumys bastalyp ta ketken edi.

Qaırat Ábilda

Qaraǵandy vokzalyndaǵy keń aýqymdaǵy qaıta qurý jumystary aıaqtalǵan soń onyń jolaýshylardy ótkizý qabileti eki jarym esege artýy tıis degen boljam bar. Eń bastysy, temir jol qaqpasy óziniń kóz úırengen qasbetiniń tarıhı kelbetin saqtap qalady. Álbette, ishi keńeıip, jabyq perron, eskalatorlar men jolaýshylarǵa arnalǵan qosymsha termınal paıda bolady.

Jańa jobanyń vokzaldy adam tanymastaı ózgertetin túri bar. Mysaly, vokzal úıiniń oń qaptalyna japsarlas úsh qabatty ǵımarat salynady. Munda bılet kassalary, kútý zaly, medpýnkt, demalys bólmesi, saýda dúńgirshekteri, dárethanalar sııaqty jolaýshylarǵa qajetti ıgiliktiń bári qarastyrylady. Múmkindigi shekteýli jandar da bul jerde ózderin jaıly sezinetin bolady.

Qurylys tolyq aıaqtalǵanda, jańarǵan vokzal ishine 2300 adam syıady degen boljam bar. Jolaýshylardy ótkizý qabileti 8 myń adamǵa deıin jetedi dep josparlanǵan.

Taıaýda oblys ákimi temir jol vokzalyna arnaıy baryp, ondaǵy qurylystyń jaı-japsarymen tanysty. Birden aıtý kerek, mundaǵy sharýanyń aıaq alysy óńir basshysynyń kóńilinen shyqpady. Eń birinshi sebep, qurylysshylar kestedegi belgilengen merzimnen bir jarym aıǵa kesheýildep keledi eken.

Qazirgi ýaqytta vokzal basyndaǵy qurylysqa 110 adam jumyldyrylǵan. Al kestedegi mejeli ýaqytty qýyp jetý úshin qosymsha jumys kúshi qajet. Sondyqtan merdigerler taǵy 80 adamdy jumysqa tartýdy josparlap otyrǵanyn aıtty.

– Bul – bizdegi basty nysan! Jyldamdatý kerek. Biraq bul sapaǵa áser etpeýi tıis, – dedi oblys ákimi. Sonymen birge qala ákimine, qurylys, jolaýshylar kóligi jáne avtomobıl joldary basqarmalarynyń basshylaryna qurylysty kún saıyn baqylaýdy qatań tapsyrdy. Al ózi bolsa, temir jol vokzalyna aptasyna bir ret kelip, jumys barysyn tekserip otyratynyn eskertti.

Qaraǵandy vokzalyn qaıta qurýmen Nur-Sultan qalasynda tirkelgen «KamStroı» JShS aınalysyp jatyr. Merdiger kompanııanyń ókili Azamat Qajın málimdegendeı, qurylys jumystary jeltoqsan aıynda tolyqtaı aıaqtalýy tıis. Álbette, iri, aýqymdy jumysty qolǵa alǵanda, keıbir maıda-shúıde sharýalardan bereke qashatyny belgili. Máselen, Qaraǵandy vokzalynda qaıta qurý jumystary bastalǵanda, eń aldymen ǵımarat ishinde jolaýshylarǵa túrli qyzmet túrlerin kórsetetin jeke kásipkerler zardap shekti. Atap aıtqanda, vokzal ishinde eki birdeı tamaqtandyrý núktesin jalǵa alyp otyrǵan jeke kásipker Kúlnár Bekjanova amaldyń joqtyǵynan kelisimshartty úzýge májbúr bolypty. Kásipkerdiń sózine sensek, úsh jylǵa jalǵa alý aqysyn tólegeni óz aldyna, vokzaldaǵy dámhanalardyń jóndeýin ózi júrgizip, ájeptáýir somadaǵy qarjy jumsaǵan. «Aldaǵy ýaqytta jaǵdaıdyń qalaı bolatyny belgisiz», deıdi sharasyz kásipker. Mundaı kúıge dýshar bolǵan jalǵyz Kúlnár ǵana emes. Vokzaldan nesibesin aıyryp júrgen basqa kásipkerlerdiń de jaǵdaıy men kóńil kúıi máz emes.

Degenmen, qıyndyqqa tap bolǵan bıznes ókilderine jergilikti kásipkerler palatasy kómekke keldi. Olar jaǵdaıdy jan-jaqty zerttep bolǵannan keıin, «Qazaqstan temir joly» UK» AQ magıstraldyq jeli dıreksııasyna birneshe usynysy bar hat jóneltti. Sonyń nátıjesinde kenshiler astanasyna «QTJ» UK» AQ fılıalynyń vokzal sharýashylyǵy jónindegi dırektorynyń orynbasary Abaı Dosanov arnaıy kelip, qalyptasqan jaǵdaıdan shyǵýdyń naqty joldaryn aıtty.

«Biz uzaqmerzimdi, ıaǵnı úsh jylǵa arnalǵan kelisimsharty bar kásipkerlerge basymdyq beremiz. Qalǵandarynyń kelisimshart merzimi sáýir aıynda aıaqtalǵan soń, konkýrs jarııalaımyz. Jóndeý jumystary kezinde kásipkerlermen qysqa merzimdik kelisimshart jasasý jónindegi hat basshylyqqa jiberildi», dedi ol. Al kásipkerler palatasynyń jergilikti fılıaly jaǵdaıdy jiti qadaǵalap otyratynyn málimdedi.

Qazirgi tańda vokzaldaǵy bılet kassalary kórshi turǵan avtovokzal ǵımaratynyń bir buryshyna ýaqytsha kóshirilgen. Poıyz tosqan jolaýshylar bolsa, aıadaı ǵana jerge syımaǵandyqtan, avtovokzaldyń kútý zalyn panalaýǵa májbúr. Al avto-vokzal aýmaǵy jekemenshik telim bolǵandyqtan, onyń óz tártibi bar. Máselen, atalǵan nysan jaz aılarynda tańǵy 7.00-den túngi 23.00-ge deıin ǵana jumys isteıdi. Tipti sońǵy avtobýstar 21.00-de saparǵa attanatyndyqtan, avtovokzal esigi budan erterek te jabylyp qalatyn kúnder bolady. Iаǵnı, mundaı jaǵdaıda poıyz tosqan aǵaıynnyń tártipke baǵynyp, avtovokzal ishin amaldyń joqtyǵynan bosatatyny belgili. Mine, vokzal basynda qurylys jumystary qyz-qyz qaınap jatqan kezde, jolaýshylar osyndaı qıynshylyqtarǵa tap bolyp jatyr. Árıne, munyń bári ýaqytsha ekeni belgili. Al ázirge ondaǵan jyldar boıy kúrdeli jóndeý kórmegen Qaraǵandy vokzaly qaıta túlegende, munyń bári de bir kórgen tústeı óte shyǵar dep kóńildi jubatqannan basqa amal joq.

QARAǴANDY

Kúnniń mańyzdy jáne ózekti jańalyqtaryn «Egemen Qazaqstan» telegram kanalynan oqyńyz