Aımaqtar • 08 Mamyr, 2019

Túrkistan oblysynyń ákimi soǵys ardagerlerin quttyqtady

831 ret kórsetildi

Túrkistan oblysy boıynsha ekinshi dúnıejúzilik soǵysy ardagerleri jáne olarǵa teńestirilgender sany – 12 849, onyń ishinde 63-i soǵysqa qatysýshylar men múgedekter, 3-i qaza tapqan jaýyngerlerdiń jary jáne 9445 tyl ardageri bar. Oblys ákimi О́mirzaq Shókeev Uly Jeńistiń 74 jyldyǵy qarsańynda ardagerlerdiń úıine baryp arnaıy quttyqtady.

Uly Otan soǵysynyń ardageri Ábjappar Daırabaıuly 1927 jyly 1 qańtarda Syr boıyndaǵy Tartoǵaıda dúnıege kelgen. 1943 jyly maıdanǵa alynyp, Belarýs, Ýkraınada, Polshany azat etýge qatysqan. «Uly Otan soǵysy» ordenimen, «Eren eńbegi úshin» medalimen marapattalǵan. Elge oralǵannan soń ustazdyq etken. Ardager 3 qyz ben 2 uldan 6 nemere tárbıelep otyr. Ábjappar Daırabaıulyn merekemen quttyqtap, hal-ahýalyn bilgen oblys ákimi Uly Otan soǵys ardageri Nemet Abdrasılovtyń shańyraǵynda boldy. Nemet qarııa 1922 jyly 1 qańtarda Túrkistan qalasynda dúnıege kelip, soǵys jyldary 1-gvardııalyq artıllerııalyq dıvızııa quramynda nysanashy, zeńbirek komandıri bolǵan. Ýkraına, Belorýssııa maıdandary men Stalıngrad, Kýrsk shaıqastaryna qatysqan. I dárejeli «Otan», II jáne III dárejeli «Dańq» ordenderimen, eki «Qyzyl Juldyz» ordenimen, «Germanııany jeńgeni úshin», «Berlındi alǵany úshin», «Varshavany azat etkeni úshin» medaldarymen marapattalǵan.  Ardager 5 ul men 1 qyzdan 20 nemere, 18 shóbere súıip otyr. Oblys ákimi ardagerlerdiń soǵysta kórsetken erligin búgingi urpaqtyń qamy úshin jasalǵandyǵyn aıtyp, syı-sııapat jasady. Batyrlarǵa denniń saýlyǵyn, ǵumyrdyń uzaqtyǵyn tiledi.

Aıta ketelik, mereke qarsańynda oblystyń barlyq aýdandar men qalalarynda jergilikti bıýdjet esebinen Uly Otan soǵysyna qatysýshylarǵa 100 aılyq eseptik kórsetkish mólsherinde, ıaǵnı 252 500 myń teńgeden, olarǵa teńestirilgen azamattarǵa 5 AEK (12 625 teńge) mólsherinde birjolǵy materıaldyq kómek beriledi.

Túrkistan oblysy

Sońǵy jańalyqtar

15169 adam koronavırýs juqtyrdy

Koronavırýs • Keshe

Uqsas jańalyqtar