Tótenshe jaǵdaılar departamentiniń basshysy Ramıl Kamalovtyń aıtýynsha, agrarshylardyń salǵyrttyǵy men ákimderdiń baqylamaýy saldarynan osyndaı oqys jaıttar jıi ushyrasady. Eń bastysy, qaýipsizdik talaptary qatań saqtala bermeıdi.
«Oblys aýmaǵynda 32 órt sóndirý beketi, 411 órtke qarsy erikti quram jasaǵy jumys isteıdi. Qoldanystaǵy zańǵa sáıkes, eger eldi mekende memlekettik órtke qarsy qyzmet bolmaǵan jaǵdaıda orman jáne ormandy alqaptardaǵy órtti sóndirý aýdan ákiminiń tikeleı quzyretine kiredi. Soǵan qaramastan kómek qolyn sozýdan bas tartqan emespiz», deıdi R. Kamalov.
Egis tanaptarynda qurǵaq shópti, sabandy jaǵý, qaraýsyz qaldyryp ketý sońy da órttiń taralýyna birden-bir sebepker bolyp otyr. Sońǵy kúnderi 6 orman órti tirkelgen. 39 tulǵa ákimshilik jaýapkershilikke tartylyp, 300 myń teńge aıyppul salynǵanymen, oń nátıje baıqalmaıdy.
«Sebebi buǵan etterińiz ábden úırenip ketken. Jyl saıyn aǵashtar otqa oranady, tabıǵatqa úlken zalal keltiriledi. Kinálilerdi jazalaıtyn dálelderińiz de, yntalaryńyz da joq. Eger respýblıkalyq trassa mańynda aǵashtar kúıip jatsa, «QazAvtoJol»-dy jazalaý qajet. Aýdandyq mańyzy bar joldar boıynda oryn alsa, ákimderderdi jaýapkershilikke tartyńyzdar», dedi osy másele boıynsha talqylanǵan otyrysta aımaq basshysy Qumar Aqsaqalov.
Soltústik Qazaqstan oblysy
