– «Jýsan-2» operasııasynyń nátıjesinde qutqarylǵan 231 otandasymyzdyń 16-sy – er adam, 59-y – áıel jáne 156-sy bala. Bul gýmanıtarlyq sharaǵa AQSh tarapy men sırııalyq demokratııalyq kúshter qoldaý kórsetti, – dedi E.Ashyqbaev.
Al osy brıfıngte Ulttyq qaýipsizdik komıtetiniń departament bastyǵy Baqytbek Rahymberdıev DAISh jaǵynda qarýly qaqtyǵystarǵa qatysty degen kúdikpen 16 er adam men 4 áıeldiń elimizge jetkizilgen boıda qamaýǵa alynǵanyn habarlady.
– UQK tarapynan elge qaıtarylǵandar Nur-Sultan, Almaty qalalary men Almaty, Atyraý, Batys Qazaqstan, Aqtóbe, Aqmola, Qaraǵandy, Túrkistan, Mańǵystaý oblystarynyń azamattary. Olar elge óz erikterimen oralýǵa sheshim qabyldaǵan, oǵan qosa, birqatary istegen isteri boıynsha qylmystyq jaza ótkerýge daıyn, – dedi B.Rahymberdıev.
UQK ókiliniń aıtýynsha, 55 áıel men balalar Aqtaý qalasynyń tóńiregindegi beıimdeý ortalyǵyna ornalastyrylǵan. Sol jerde medısınalyq tekserýden ótkizilip, olarǵa psıhologtar, teologtar jáne úkimettik emes uıym ókilderi kómek kórsetýge kirisken.
Sonymen qatar jeke kýálikterin joǵaltyp alǵan birqatarynyń jeke basyn anyqtaıtyn qujattary qalpyna keltirilýde. Karantındik ortalyqtaǵy bir aı ishinde olardyń qandaı da bir qylmysqa qatysy bolmaǵany dáleldense, burynǵy turǵylyqty jerlerine jiberiledi.
Taǵy bir atap óterligi, 156 balanyń 107-si – jeti jasqa da tolmaǵan. Al 18 bala tul jetim – áke-shesheleri soǵys aımaǵynda ólgen nemese iz-túzsiz joǵalyp ketken. Balalardyń basym bóligi shetelderde dúnıege kelgen.
