Prezıdent • 17 Mamyr, 2019

Qasym-Jomart Toqaev eńbek jáne jumyspen qamtý máseleleri boıynsha jıyn ótkizdi

1158 ret kórsetildi

Bul týraly Aqordanyń baspasóz qyzmeti habarlady.

Jıynǵa Parlament depýtattary, Úkimet músheleri, qoǵamdyq uıymdardyń ókilderi jáne ınvestorlar men iri kompanııalardyń basshylary qatysty.

Qazaqstan Prezıdenti bul saladaǵy memlekettik saıasat halyqty laıyqty jumyspen qamtý jáne ádil eńbekaqyǵa negizdelýi tıis dep atap ótti. Ol úshin Úkimettiń aldyna shuǵyl sheshilýi tıis birneshe mindet qoıdy.

– Birinshi. Eńbek naryǵynyń suranysyna saı mamandar daıarlaý. Tórtinshi óndiristik revolıýsııa jańa mamandyqtardyń paıda bolýyna ákeledi. Búginde alǵan bilimniń ýaqyt ótken saıyn jaramsyz bolyp qalýy jıi kezdesedi. Úkimet bilim berý baǵdarlamalarynyń álemdik standartqa saı keshendi jańarýyn qamtamasyz etý qajet, – dedi Memleket basshysy.  

Qazaqstan Prezıdenti osy baǵytta aldaǵy úsh jylda aldyńǵy qatarly 180 kolledj ben 20 joǵary oqý ornynyń kúsheıtiletinin aıtty. Úkimetke joǵary jáne kásibı tehnıkalyq bilim berýdiń sapasyn baqylaý tapsyryldy.

Sapaly jumys oryndaryn qurý – ekinshi negizgi mindet.

– Bizdegi qurylyp jatqan jumys oryndarynyń kóbi qysqa merzimge beıimdelgen. Mundaı ádispen halyqty tıimdi jumyspen qamtamasyz etý múmkin emes, eńbek naryǵyn ýaqytsha ǵana turaqtandyrady. Sondyqtan, biz eń aldymen maman jetispeıtin óńdeý ónerkásibi, aýyl sharýashylyǵy, týrızm, qyzmet kórsetý, aqparattyq tehnologııalar salalarynda turaqty jumys oryndaryn ashýymyz qajet, – dedi Memleket basshysy.

Úshinshi mindet – Jumyspen qamtýdyń jańa qalyptary.

Qasym-Jomart Toqaev jahandyq tehnologııalyq trendter eńbek naryǵynyń keń kólemde transformasııalanýyna ákeletinin aıtty.

– Qazirgi kezde eńbek sharty, kásipodaq, eńbek demalysy sııaqty uǵymdar ózgeriske ushyraýda. Frılanserlerdiń, aýt-sıafferlerdiń jáne basqalarynyń sany kóbeıýde. Osyǵan baılanysty normatıvtik retteýlerdi qaıta qaraý qajet, – dedi Qazaqstan Prezıdenti.

Memleket basshysy jastardy jumysqa ornalastyrýdy tórtinshi negizgi mindet retinde atap ótti.

– Joǵary oqý oryndardy bitirgen túlekterdiń jumysqa ornalasýy 50 paıyzdan sál ǵana asady. Bizdegi «Jasyl el», «Dıplommen aýylǵa», «Serpin», «Jastar – El tiregi», «Jastar praktıkasy» sııaqty baǵdarlamalardyń tıimdiligin arttyrý kerek. Olardyń qaısy naqty jumys isteıdi, qanshasy júzege aspaı jatyr? Osylardy qaıta qaraý qajet. Bul máseleni udaıy nazarda ustaý kerek, – dedi Qasym-Jomart Toqaev.

Besinshi – ınklıýzıvtilik.

Qazaqstan Prezıdenti Úkimetke «Eńbek» memlekettik baǵdarlamasy arqyly múmkindigi shekteýli azamattardyń jumysqa ornalasýyn qamtamasyz etýdi qarastyrýdy tapsyrdy.

– Búginde Qazaqstanda múmkindigi shekteýli 410 myń adam eńbekke qabiletti. Olardyń teń jartysy qalypty eńbek jaǵdaıynda jumys isteı almaıdy.  Iаǵnı, 120 myń adam jumysty qajet etip otyr, – dedi Memleket basshysy.

Qasym-Jomart Toqaev eńbek mobıldiligin arttyrýdy altynshy mindet dep kórsetti.

– Bul máselege keshendi túrde qaraý kerek. Sheneýnikterge emes, adamdarǵa yńǵaıly bolatyn tıimdi joldaryn qarastyrý qajet. Úkimet pen ákimderge birlesip mobıldi eńbektiń tıimdiligin arttyrý tetikterin jasaýdy tapsyramyn, - dedi Qazaqstan Prezıdenti. 

Úkimetke júktelgen sońǵy mindet – genderlik teń quqyqty nyǵaıtý. Qasym-Jomart Toqaev birtindep áıelderdiń eńbegin qorǵaý, olardyń memlekettik basqarýdyń barlyq deńgeılerinde jáne korporatıvtik salalarǵa qatysýyn qamtamasyz etý sharalaryn ázirleý qajettigin aıtty.

Sońǵy jańalyqtar

Álemdegi eń úlken muzdyq erip ketti

Ekologııa • Búgin, 11:05

15169 adam koronavırýs juqtyrdy

Koronavırýs • Keshe

Uqsas jańalyqtar