«Astana ekonomıkalyq forýmy» aıasynda munaıly óńir men qarjy ortalyǵy birlesip «Global Silk Road Mangystau invest-2019» halyqaralyq forýmyn ótkizdi. Nátıjesinde Mańǵystaý oblysy alǵash bolyp «Astana halyqaralyq qarjy ortalyǵymen» memorandýmǵa qol qoıdy. Osylaısha, oblys ákimi Eraly Toǵjanov pen AHQO basqarýshysy Qaırat Kelimbetov jańa memorandým aıasynda jan-jaqty kelisimge keldi. Forým barysynda kásipkerlermen quny 230 mln AQSh dollaryn quraıtyn eki ınvestısııalyq jobany iske asyrý jóninde ýaǵdalastyq jasaldy.
О́ńirlerge ınvestısııa tartýdyń jańa modeli retinde bıyl «Astana ekonomıkalyq forýmynyń» aıasynda «óńir qonaq» jańa júıesi engizilip, oǵan alǵash bolyp Mańǵystaý oblysy tańdaldy. Bul júıeniń basty maqsaty – óńirge álemdik deńgeıdegi jańa ınvestorlar men qarjy uıymdaryn jumyldyrý.
Qazirgi tańda Mańǵystaý oblysynda 2019-2025 jyldarǵa baǵyttalǵan, 2,4 trln teńgeni quraıtyn 44 ınvestısııalyq joba qarastyrylýda.
Onyń ishinde, shet memleketterdiń qatysýymen 2,2 trıllıon teńgeni quraıtyn 18 jobany iske asyrý josparlanǵan. Sondaı-aq 2019 jyly oblysta 66,7 mlrd teńgeni quraıtyn 22 jobany, onyń ishinde, quny 38,4 mlrd teńgeni quraıtyn 4 jobany sheteldikterdiń qatysýmen iske qosý josparlanyp otyr.
Tuńǵysh Prezıdenttiń tapsyrmasyna sáıkes, Mańǵystaý oblysynyń ákimdigi «SOP«Mangıstaý» JShS bazasynda ınvestorlarǵa bir tereze qaǵıdaty boıynsha qyzmet kórsetýge arnalǵan «Front ofıs» ashty.
«Front ofıstiń» basty maqsaty – ınvestorlardyń barlyq úkimettik jáne basqa uıymdarǵa qatysty jumystaryn arttyrý. Munda áleýetti ınvestor Mańǵystaý oblysyndaǵy ınvestısııalyq qyzmetti memlekettik qoldaýdyń yqtımal nysandary týraly jáne ózderine qajetti barlyq aqparatty alady. Búginde oblys ákimdigi ınvestısııalyq saıasatty júzege asyrý maqsatynda, memlekettik organdar men basqa da uıymdar arasyndaǵy ózara árekettesý erejelerin daıyndap berdi. Erejede «front ofıstiń» búkil jumysy qarastyrylǵan, dedi E.Toǵjanov.
Sonymen qatar aldaǵy 5 jylda oblysty damytýdyń basym baǵyttary – týrızm, aýyl sharýashylyǵy, ónerkásip, energetıka, kólik jáne logıstıka salalarynda 6 ınvestısııalyq qurylym bar. Ár salanyń ınvestısııalyq tartymdylyǵy orys, aǵylshyn, túrik, parsy, qytaı tilderine aýdarylyp, jazba túrde usynylady. Sheteldik ınvestorlardyń qatysýymen kóp fýnksıonaldy logıstıkalyq ortalyqtyń, tuzsyzdandyrý zaýytynyń, kaýstıkalyq soda men tuz qyshqylyn shyǵaratyn zaýyttyń, sý tushytý qondyrǵysynyń qurylysy sııaqty perspektıvalyq jobalar júzege asyrylýda.
Yńǵaıly geografııalyq ornalasýy, baı tarıhı muralary, teńizge shyǵýdyń qoljetimdiligi, sondaı-aq negizgi týrıstik aǵyndardy týdyratyn elderge jaqyn bolý týrızmdi damytýǵa múmkindik beredi.
Mańǵystaýda týrızmdi damytý úshin, 63 shaqyrymǵa sozylǵan teńiz jaǵalaýynda ınjenerlik ınfraqurylym jumystary bastalyp ketti.
– О́ńirdiń klımattyq jaǵdaıy aımaqqa elektr qýatynyń qosymsha kózi úshin, kún jáne jel elektr stansalaryn salýǵa múmkindik beredi. Aımaqtyń shýaqty kúnderiniń uzaqtyǵy jylyna – 300 kún. Bul eldegi eń jaqsy kórsetkish, jeldiń jyldamdyǵy – 8,43 metr sekýnd. Sondyqtan mańyzdy sektordyń biri – balamaly energııa kózderin damytý. Bul keleshekte elektr energııasyn óndirýdiń barlyq dástúrli ádisterin toqtata alatyn eń perspektıvaly resýrstardyń biri. Búgingi tańda aımaqta qýaty 90 MVt jel elektr stansasy salynyp jatyr, dedi óńir basshysy.
