Shymkenttiń 2020 jyly TMD-nyń mádenı astanasy bolyp jarııalanýy úlken mártebe ekenin aıryqsha atap ótken qala ákimi Ǵabıdolla Ábdirahymov jyl boıy úshinshi megapolıs aýqymdy mádenı baǵdarlamalar men kezdesýler ótetin ashyq alańǵa aınalatynyn jetkizdi.
«Túrikmenstanǵa jasaǵan sapar barysynda osy el Úkimet tóraǵasynyń orynbasary – syrtqy ister mınıstri Rashıd Meredovpen, Ashǵabad qalasynyń ákimi Shamýxammet Dýrdylyevpen, Túrikmenstannyń saýda-ónerkásip palatasynyń ókilderimen jáne TMD elderinen kelgen basqa da áriptesterimizben iskerlik kezdesýler ótkizdik. Bul saparymyzdyń basty maqsaty – Shymkent qalasynyń tanystyrylymyn ótkizý jáne sheteldermen mádenı-iskerlik baılanystardy nyǵaıtý boldy», deıdi Ǵabıdolla Ábdirahymov.
Atalǵan forýmda shahar basshysy Shymkent qalasynda júzege asyp jatqan jobalarǵa toqtalyp, mádenıet salasyndaǵy aýqymdy jumystardy aıtyp ótti.
«2200 jyldyq tarıhy bar shaharda «Eski qalashyq – Sıtadeldi» qaıta jańartý men Qoshqar ata ózeniniń jaǵalaýyn abattandyrý jumystary bastaldy. «Sıtadel» – Shymkenttiń biregeı mádenı-tarıhı aımaǵy. Qalpyna keltirý jumystary aıaqtalǵannan keıin bul nysan megapolıstiń ǵana emes, búkil Qazaqstannyń jarqyn týrıstik brendine aınalatyn bolady», dedi ákim óz sózinde.
Qala ákiminiń aıtýynsha, Shymkentte 3 myń oryndy zamanaýı «Kongress-ortalyq» salý men 20 myń oryndyq ortalyq stadıondy qaıta jańǵyrtý josparlanýda. Jáne de Shymkent qalasy əýejaıynda jańa jolaýshylar termınalynyń qurylysy bastalǵan. Jobanyń ınvestısııalyq quny 50 mıllıon AQSh dollaryn quraıdy. Jańa termınaldyń iske qosylýy nátıjesinde áýejaıdaǵy jolaýshylar aǵymy 10 esege artatyn bolady. Sonymen qatar qaladaǵy temir jol vokzalyna jańǵyrtý jumystary júrgizilýde. Nátıjesinde qyzmet kórsetýdiń halyqaralyq standarttaryna sáıkes kúnine 9 myńǵa jýyq jolaýshyny qabyldaı alady.
Zamanaýı ınfraqurylymnyń joǵary halyqaralyq standarttaryna saı 400 gektar aýmaqta salynyp jatqan «Shymkent City» qalashyǵy týraly aıtqan qala ákimi «Heppılend» otbasylyq oıyn-saýyq kesheni de boı kóteretinin málimdedi.
Sóz sońynda Ǵabıdolla Ábdirahymov Shymkenttiń kelisti kelbetimen, ejelgi tarıhymen, janǵa jaıly klımatymen, qonaqjaı qalpymen, ulttyq salt-dástúrimen maqtana alatynyn jetkizdi. Ári sheteldik azamattardy Qazaqstannyń ońtústigindegi shyraıly qalaǵa qonaqqa shaqyrdy.
ShYMKENT
