Bıyl 29 mamyrda Nur-Sultan qalasynda Qazaqstan Prezıdenti Qasym-Jomart Toqaevtyń tóraǵalyǵymen Nursultan Nazarbaevtyń eýrazııalyq ıntegrasııa jónindegi ıdeıasynyń 25 jáne Eýrazııalyq ekonomıkalyq odaq jónindegi kelisimge qol qoıylýynyń 5 jyldyǵyna oraı Joǵary Eýrazııa ekonomıkalyq keńesiniń kezekti otyrysy ótedi.
Is-sharaǵa Qazaqstan Respýblıkasynyń Tuńǵysh Prezıdenti – Elbasy N.Nazarbaev, Belarýs Respýblıkasynyń Prezıdenti A.Lýkashenko, Qyrǵyz Respýblıkasynyń Prezıdenti S.Jeenbekov, Reseı Federasııasynyń Prezıdenti V.Pýtın, Armenııa Respýblıkasynyń Premer-Mınıstri N.Pashınıan qatysady.
Sonymen qatar, Eýrazııalyq ekonomıkalyq odaq janyndaǵy baqylaýshy memleket basshysy retinde Moldova Respýblıkasynyń Prezıdenti I.Dodon jáne qurmetti qonaq retinde Tájikstan Respýblıkasynyń Prezıdenti E.Rahmon qatysady dep kútilýde.
Jıynda memleketter basshylary Eýrazııalyq ekonomıkalyq odaq jumysynyń ózekti máselelerin jáne odan ári damýdyń perspektıvalaryn, sonyń ishinde sıfrlyq kún tártibi men Odaqtyń halyqaralyq qyzmetiniń negizgi baǵyttarynyń júzege asyrylýyn qarastyrady. Sondaı-aq, Eýrazııalyq ekonomıkalyq odaqtyń 2019-2020 jyldarǵa arnalǵan makroekonomıkalyq saıasatynyń negizgi baǵyttaryn talqylaıdy.
Sammıt qorytyndysy boıynsha memleketter basshylarynyń – Joǵary Eýrazııa ekonomıkalyq keńesi músheleriniń Eýrazııalyq ekonomıkalyq odaq jónindegi kelisimge qol qoıylýynyń 5 jyldyǵyna oraı birlesken málimdemesi qabyldanady, sondaı-aq, birqatar halyqaralyq qujattarǵa qol qoıylady dep josparlanýda.
