Qazaqstanda 821 kolledj bar, onyń ishinde 479 – memlekettik, 342 – jekemenshik. Búginde kolledjderde barlyǵy 488 myńnan astam adam oqıdy, onyń ishinde 199 myńy - «Barshaǵa arnalǵan TjKB» jobasy boıynsha oqıdy. Jumysshy mamandyqtary boıynsha bilimniń sapasy men qoljetimdiligin arttyrýda júrgizilip jatqan jumystar týraly QR Bilim jáne ǵylym mınıstri K. Shámshıdınova, QR Eńbek jáne halyqty áleýmettik qorǵaý mınıstri B. Saparbaev, Atyraý jáne Soltústik Qazaqstan oblystarynyń ákimderi baıandady.
Máseleni qaraý barysynda, sonymen qatar, QR Premer-Mınıstriniń orynbasary G. Ábdiqalyqova, «Samuryq-Qazyna» ulttyq ál-aýqat qory» AQ basqarma tóraǵasy A. Esimov, «Atameken» UKP basqarma tóraǵasynyń orynbasary O. Ordabaev, kolledjderdi senimdi basqarýda tájirıbesi bar JOO-lar men bıznes ókilderi baıandama jasady.
QR Úkimetiniń basshysy Asqar Mamın tehnıkalyq kásiptik bilim berý júıesinde sapaly bilimdi, suranysqa ıe mamandyqtardy jáne jumysqa ornalasý kepildigin alýǵa jaǵdaılar jasaý qajettigin atap ótti. Bul jahandyq eńbek naryǵynyń ózgerýimen jáne ekonomıka salalary úshin, onyń ishinde jappaı sıfrlandyrý úshin sapaly kadrlar daıarlaýdyń álemdik betalystarynyń paıda bolýymen baılanysty.
Kadrlardy daıarlaý zaman talabyna saı bolýy qajet. Asqar Mamın kásiptik-tehnıkalyq daıarlaý júıesin jańǵyrtýda barlyq áleýmettik-ekonomıkalyq faktorlardy, onyń ishinde oqý mekemeleriniń aýmaqtyq qoljetimdiligin, kópbeıindiligi men tıimdiligin, túlekterdiń suranysqa ıe bolýyn eskerý kerektigin atap ótti.
QR Premer-Mınıstri jobalyq keńse quryp, kolledjderdi senimgerlik basqarýǵa qyzyǵýshylyq tanytqan bıznes-qaýymdastyqpen jáne JOO-men áriptestiktiń naqty mehanızmderin ázirleýdi tapsyrdy. Otandyq ekonomıkamyzdyń iri kompanııa kóshbasshylary óz senimgerlik basqarýyna shamamen 150 kolledjdi, ýnıversıtetter - 50-ge jýyq kolledjdi ala alady.
QR Úkimetiniń basshysy atap ótkendeı, dýaldy oqytýdy engizý men keńeıtý boıynsha jumysty kúsheıtý maqsatynda kásiporyndar kolledj bazasynda ortalyqtar asha alady. Bul kolledjderdiń jumysyn jumys berýshiniń suranysyna jaqyndatyp, túlekterge jumysqa ornalasýǵa kepildik bola alady. Bul baǵytta tabysty tájirıbeler bar, «Qazaqmys» korporasııasy Sátpaev qalasyndaǵy taý isi tehnologııalyq kolledjinde, Balqash qalasyndaǵy polıtehnıkalyq kolledjinde osyndaı ortalyqtar ashty.
«Elbasynyń neǵurlym talap etiletin 100 kásip boıynsha 180 kolledj ben 20 joǵary oqý ornyn jańǵyrtý jáne mamandar daıyndaýdyń halyqaralyq tájirıbesin engizý jónindegi tapsyrmasyn iske asyrý qajet», - dep atap ótti A. Mamın. Bul maqsatta osy jyldyń sońyna deıin kásiptik standarttardy ázirleýdi aıaqtaý, sondaı-aq, kásibı biliktilik prosesin zańnamalyq retteý boıynsha usynystardy engizý tapsyryldy.
QR Úkimetiniń basshysy oblys ákimdikteriniń nazaryn WorldSkills halyqaralyq jobasyna qatysý jáne jumystyq quzyretterin damytý úshin óńirlerde osy qozǵalysqa qatysý úshin barlyq jaǵdaılardy jasaý qajettigine aýdardy. Qosymsha tetik mektepten tys uıymdar bola alady, onda qazirgi talaptardy eskerýmen, mysaly, baǵdarlamalaýda, mobıldi qosymshalar men óz jobalaryn jasaýda balalardyń daǵdylary qalyptastyrylady.
Máseleni qorytyndylaǵan QR Premer-Mınıstri Asqar Mamın kadrlarǵa qajettilikti boljamdaý, kolledjder men bilim berý baǵdarlamalaryn jańǵyrtý, memlekettik bilim berý tapsyrysyn qalyptastyrýdy jetildirý boıynsha sharalardy ázirleýdi tapsyrdy.
«Árbir adam óziniń suranysqa ıe mamandyq alǵanyna jáne keıin jumysqa ornalasa alatynyna senimdi bolýy kerek», - dedi A. Mamın.
