Qazaqstan Prezıdenti «Bolashaq» zaýytynyń óndiristik nysandaryn tikushaqpen aralap kórdi.
Memleket basshysyna munaı-gaz salasynyń ahýaly men ony damytý perspektıvalary jóninde baıandaldy. Sonymen qatar Qasym-Jomart Kemelulyna munaı óńdeýdiń jáne turaqtandyrýdyń, suıytylǵan gazdy munaıdan ajyratyp alý men tazalaýdyń, tabıǵı kúkirtti óndirýdiń jáne ony saqtaý men tasymaldaýdyń tehnologııalyq úderisteri tanystyryldy.
Qasym-Jomart Toqaev óndiris ornynyń Atyraý qalasynan alys emesin atap ótip, qorshaǵan ortany qorǵaýǵa erekshe kóńil bólýge shaqyrdy. Sonymen qatar Memleket basshysy Qazaqstan azamattarynyń eńbek quqyǵyn saqtaýdyń mańyzdylyǵyna toqtaldy.
Qazaqstan Prezıdenti kásiporyn ujymyn táýligine 370 myń barrel munaı óńdep, rekord jańartýymen quttyqtady jáne munaıshylarǵa tabys, baq-bereke tiledi.
Qazaqstan Prezıdenti Qasym-Jomart Toqaev odan keıin ARES PetroTechnic joǵary kolledjine bardy. Memleket basshysy kolledjdiń oqý korpýsyn, laboratorııalaryn, sheberhanalaryn, kitaphanasy men jataqhanasyn aralap kórdi.
Qazaqstan Prezıdentine halyqaralyq standarttar men álemdik ozyq tájirıbeni, sondaı-aq sheteldik jáne otandyq munaı-gaz kompanııalarynyń talaptaryn eskere otyryp ázirlengen ınnovasııalyq bilim baǵdarlamalaryn paıdalaný APEC PetroTechnic kolledjiniń basty ereksheligi ekeni baıandaldy.
Tájirıbege negizdelgen oqytý barysynda shynaıy óndiristik úderister jasalady. Sonyń arqasynda túlekter kolledj bitirgen soń, birden óndiristegi kúrdeli mindetterdi tabysty atqara alady.
Stýdenttermen jáne oqytýshylar ujymymen áńgimelesý barysynda Qasym-Jomart Toqaev iri halyqaralyq munaı-gaz kompanııalary úshin mamandardy shetelderde emes, Qazaqstanda daıarlaýdyń mańyzdylyǵyn aıtty. Onyń pikirinshe, bul úshin kolledjde barlyq jaǵdaı jasalǵan.
Prezıdent Qasym-Jomart Toqaevtyń óńirge jumys sapary búgin jalǵasady.
Atyraý oblysy
