Tarıhqa taǵzym etti

Qasiretti tarıhqa qatysty eske alý, taǵzym etý sharasyn Qazaqstan halqy Assambleıasy umyt qaldyrǵan emes. Olar «Tarıhtan ta­ǵy­­lym – ótkenge taǵzym» halyqaralyq jo­ba­synyń is-sharalaryn alǵash ret 2010 jy­­ly Astana qalasynda uıymdastyryp, «ALJIR» murajaı-memorıaldyq kesheninde «Tarıhtan – búgingi kúnge» atty TMD elderi tarıhshylarynyń birinshi forýmy ótti. Oǵan 300-den astam akademııalyq tarıh ǵylym­darynyń otandyq jáne sheteldik ǵalymdary qatysty. Forým nátıjesi boıynsha tarıhı murany zertteýdiń biryńǵaı joldaryn ázirleý boıynsha Astana Hartııasy qabyldandy.

Bıyl Mańǵystaý oblysy Qazaqstan halqy Assambleıasy «Tarıhtan taǵylym – ótkenge taǵzym» atty jyl saıynǵy halyqaralyq jobanyń sheńberinde Qaraqııa aýdan orta­lyǵynda Saıası qýǵyn-súrgin qurbandaryn eske alý kúnine arnalǵan «Tarıh qasireti» aksııasyn ótkizdi.

Ulttyq birlik pen qoǵamdyq kelisimdi nyǵaıtýǵa jáne jalpy qundylyqtardy qa­lyptastyrýǵa yqpal etýge, tarıhta iz qal­dyrǵan qasiretti oqıǵany keleshek urpaqqa tarıhı derek retinde jetkizip, olardy ótkendi qast­erleýge, ult tarıhyna jáne táýel­sizdikke, tatýlyq pen beıbitshilikke qur­met­pen qaraýǵa tárbıeleý isinde azamattyq qoǵam men memleketti biriktirý maqsatyndaǵy aksııany Mańǵystaý oblysy Qazaqstan halqy Assambleıasy Qaraqııa aýdany ákimdigi qoldaýymen uıymdastyrdy. Is-sharaǵa qa­tysqan Qazaqstan halqy Assambleıasy men óńirlik assambleıanyń músheleri, mem­lekettik organdardyń, shyǵarmashyl zııaly qaýym, etnomádenı birlestikterdiń, jastar uıymdarynyń ókilderi, saıası qýǵyn-súrgin jáne deportasııaǵa ushyraǵan halyqtar ókilderiniń urpaqtary, mýzeı jáne muraǵat qyzmetkerleri, BAQ ókilderi úshin aýdan ortalyǵynda ornalasqan munaı murajaıyna ekskýrsııa uıymdastyryldy. Odan soń «Qasiret» memorıalynyń aldynda saıası qý­ǵyn-súrgin qurbandaryn eske alý mıtıngisi ótti. Mıtıng Saıası qýǵyn-súrgin qurbandaryn eske alý kúnine arnalǵan konsertpen aıaqtaldy.

Assambleıa ókilderi uıymdastyrǵan Saıası qýǵyn-súrgin qurbandaryn eske alý sharasy Aqtaý qalasynda da jalǵasyn tapty. Mańǵystaý oblysy Qazaqstan halqy Assambleıasy men «Choson» koreı etnomádenı bir­lestigi uıytqy boldy. Etnomádenı bir­lestik ókilderi men Mańǵystaý oblysy QHA músheleri jáne elimizdiń ár qala­synan jınalǵan «Qazaqstan koreıler qa­ýym­dastyǵy» músheleri esimi el esinde saq­talǵan qaıratkerlerdiń biri, qarapaıym jumys­shydan memleket qaıratkeri dárejesine deıin kóterilgen tulǵa Jalaý Myńbaev eskertkishine gúl shoqtaryn qoıdy. Sondaı-aq Dostyq úıinde «Uly dala murasy» já­ne «Koreı naqyshtary» atty kórme ótti. Kór­mege «MartArt» jáne taǵy da basqa óner stýdııalarynyń kórnekti kartınalary qo­ıyldy. «Choson» etnomádenı birlestiginiń tóraıymy Raısa Madenova kórmedegi óner týyndylarynyń máni men maǵynasyn tanys­tyrdy. Kórme barysynda qonaqtarǵa qazaq­tyń ulttyq taǵamdary baýyrsaq pen shubat usynyldy.

«Qazaqtaný» jobasy aıasynda qazaqtyń salt-dástúriniń biri «Tusaýkeser» uıymdas­tyrylyp, sharanyń qurmetti qonaǵy – «Qazaq­stan koreıleri qaýymdastyǵynyń» tóraǵasy Ogaı Sergeı bir jasqa tolǵan qazaq balasynyń tusaýyn kesip, táı-táı basqan baldyrǵanǵa aq tilegin arnady.

Koreıler qıyn jyldary baýyryna bas­qan qazaq halqyna degen rızashylyǵyn bildirip, qazaqtyń salt-dástúrine qurmetpen qaraıtyndyǵyn jetkizdi.

Mańǵystaý oblysy