Taǵdyr taýqymetimen atajurttan alystap qalǵan Asan qarııanyń bar ańsary – týǵan jerin bir kórý. Jat elden jumaq tapqanymen, saǵynysh meńdegen júrek jubanar emes. Kókeıdegi maqsat-tilegi tek qana týǵan jerge oralý. Parıjde uzaq jyl ómir súrgen Asan qarııa uldary Marat pen Eljanǵa: «Meni týyp-ósken Otanyma alyp baryńdar», dep ótinish aıtady. Sol tustan bastap olardyń arasynda tartys bastalady. Aıaǵynda kishi balasy áke armanyn oryndap, Qazaqstanǵa at basyn tireıdi. Kedergilerdi jeńip, Otanyna aıaq basqan qarııa munan soń da túrli qaıshylyqtarǵa tap keledi...
Drama avtory Joltaı Álmashuly teatrdyń sapary jaıynda: «Osy ýaqytqa deıin azdy-kópti birshama týyndy jazǵan ekenbiz. Alaıda báriniń birdeı joly bolyp jatyr desek, artyq sóz shyǵar, bálkim. Biri jalǵyz-aq ret qoıylyp, qaıtalap sahnalanbady, keıbiri on jyldap sahnadan túspeı qoıdy, endi biriniń joly talasqa ıektep, tastaqqa tartty, taǵy biriniń baǵy janbady – kórkem dúnıeniń de kádimgi jany bar adam sekildi taǵdyry bolady eken-aý. Al myna «Muńmen alysqan adam» jazylǵaly beri on jylǵa taqap qalypty. Osy kezeńde san ret sahnalandy, elimizdiń talaı jerlerin aralady, tipti stýdentter ony aǵylshyn tilinde sóıletip úlgerdi. Endi mine, Qazaqstannyń О́zbekstandaǵy jyly aıasynda ótetin mádenı sharaǵa tańdap alynǵan eki birdeı qoıylymnyń bireýi I.Esenberlınniń «Han Kenesi» de, al ekinshisi – meniń «Muńmen alysqan adamym». Osy sharaǵa arnaıy shaqyrtý aldym. Qany bir týysqan halyqtyń keńpeıil kórermenimen birge teatr zalynda qatar otyryp, óz qolymyzdan shyqqan drama boıynsha sahnalanǵan týyndyny tamashalaýdyń ózi ǵanıbet emes pe!» deı kelip, teatrdyń munan keıingi sapary Túrkistandaǵy R.Seıtmetov atyndaǵy sazdy-drama teatrynda jalǵasatynyn aıtty.
