Qazaq dalasyna boılaı engen bul rýh 27 jyl boıyna tek órleýmen keledi. Osynaý saltanatty merekege arnalǵan is-shara barysynda sóz alǵan Nur-Sultan qalasy ákiminiń orynbasary Erlan Qanalımov bul máselelerge aıryqsha toqtaldy.
– Rámizder halqymyzdyń muqalmas rýhyn, qaharmandyǵyn, arman-tilegin jetkizetin qundy belgiler. 1992 jyldan beri Memlekettik rámizder kúnin atap ótý qalypty dástúrge aınaldy. Rámizder azat eldiktiń aıǵaǵy bolsa, ony ulyqtaý sanaly urpaqtyń salıqaly isi. Sondyqtan da adamzat tarıhynda elin kirshiksiz súıgen arda uldary men qyzdary eldiktiń sımvoly bolǵan el rámizderin árdaıym bıik ustaǵan, – dedi E.Qanalımov.
Al Eltańba avtorlarynyń biri Jandarbek Málibekov Memlekettik rámizderimizdiń álemge tanylǵanyna asa qýanyshty ekenin bildirdi.
– Osydan 27 jyl buryn qabyldanǵan Týymyz, Ánuranymyz, Eltańbamyz qazir álemge tanyldy. Bul rámizder qazir halqymyzdy rýhtandyryp tur. О́tken jyly Eltańbamyzǵa latyn qarpi engizilgen kezde ózim ólshep-piship Elbasyna kórsettim. Tarıhymyzǵa jaqyndata túsken jańa álippe Qazaq eli táýelsizdiginiń shynaıy kórinisi bolyp otyr. Oǵan qosa, Eltańba bekitiler tusta onyń tóbesine bes juldyzdy Elbasynyń ózi qadap, elimizdiń juldyzy jarqyraı bersin degen bolatyn. Mine, sol kúnge de jettik, – dedi belgili sáýletshi.
Osy rette, Memlekettik rámizderge qatysty myna bir derektiń de artyǵy bolmas. Sol ýaqyt kýágerleriniń aıtýlaryna qaraǵanda, táýelsizdik tańy atqan soń Memlekettik rámizder pishinine jarııalanǵan baıqaý óte tartysty ótken. Atap aıtqanda, bir ǵana Týdyń ózine 600 adamnan 1 200 nusqa tússe, Eltańbanyń 245 jobasy, Ánurannyń 750 úlgisi baıqaýǵa qatysqan.
Jalpy, Memlekettik rámizder kúnin Nur-Sultan qalasynda merekeleý aýqymy óte keń boldy.
Mereke qurmetine memlekettik mekemelerde, oqý oryndarynda, qala alańdarynda 40-tan astam taqyryptyq, mádenı is-sharalar ótti. Bul kúni mektepter men kolledjderde fotokonkýrstar, kezdesýler, vıktorınalar uıymdastyrylyp, patrıotızm, elimizdiń memlekettik rámizderin bilýdiń mańyzdylyǵy jáne onyń bizdiń memleketimizdiń tarıhyndaǵy mańyzdylyǵy týraly aıtylady. Sáken Seıfýllın murajaıy men Táýelsizdik saraıynda taqyryptyq kórmeler uıymdastyryldy. Qalanyń barlyq kitaphanalarynda ádebı keshter, sol sııaqty konsertter, dárister, dóńgelek ústelder, semınarlar qala turǵyndary men qonaqtarynyń kózaıymyna aınaldy.
Jalpy, osy tektes sharalar elimizdiń barlyq qalalary men eldi mekenderinde joǵary deńgeıde uıymdastyrylǵanyn atap ótken jón.
