Mınıstrliktiń ǵylym jáne adam resýrstary departamentiniń dırektory Sáýle Sydyqova salanyń ahýaly týraly senatorlardy habardar etti. Bul rette, qalalyq jáne aýyldyq jerlerdi dáriger mamandarmen qamtamasyz etýde aıyrmashylyq saqtalýda (qalada – 10 myń turǵynǵa 56,8, aýyldyq jerlerde 10 myń turǵynǵa 16,1 mamannan keledi). Búginde jumysqa alynbaǵan shtattyq oryndar boıynsha 2481,75 dáriger tapshy bolyp otyr.
Departament basshysy medısınalyq bilim berýdi jańǵyrtý aıasynda dárigerlik ýnıversıtetterdi damytýdyń 5 jylǵa arnalǵan strategııalyq josparlary jasalǵanyn, onda oqytý baǵdarlamalaryn ózgertý jáne strategııalyq seriktester – sheteldik joǵary oqý oryndarymen birlesken bilim berý baǵdarlamasyn engizý, medısınalyq joǵary oqý oryndarynyń akademııalyq jáne basqarý derbestigin keńeıtý, ýnıversıtettik klınıkalardy qurý, professorlyq-oqytýshylar quramynyń áleýetin arttyrý kózdelgenin atap ótti.
«Búgingi tańda Densaýlyq saqtaý mınıstrligi elimizdiń densaýlyq saqtaý júıesinde adam kapıtalyn damytýdyń 2025 jylǵa deıingi tujyrymdamalyq ádisterin bekitti, ol densaýlyq saqtaý júıesinde kadr saıasatyn jetildirýdi jáne densaýlyq saqtaý qyzmetkerlerin daıarlaýdyń jáne úzdiksiz kásibı damytýdyń jańa sapasyn qamtamasyz etýdi kózdeıdi.
Densaýlyq saqtaý júıesinde kadr saıasatyn jetildirý jónindegi mindetterdi iske asyrý aıasynda salalyq biliktilik júıesi jetildiriledi, densaýlyq saqtaýdyń kadrlyq resýrstaryn basqarý tetikteri jańǵyrtylady, densaýlyq saqtaýdyń kadrlyq resýrstaryn taldaý, boljaý jáne monıtorıng júrgizý ádisteri jetildirilip, medısına qyzmetkerleriniń tartymdy beınesi qalyptasady, kásibiniń bedeli arta túsetin bolady», dedi S.Sydyqova.
Sharaǵa Nur-Sultan, Almaty, Qaraǵandy jáne Semeı medısınalyq ýnıversıtetteriniń rektorlary da qatysyp, depýtattardyń suraqtaryna jaýap berdi. Depýtattar oqý ornyn bitirgen túlekterdiń jiberilgen jerdegi qyzmetin atqarýy máselesin, túlekterdiń jalpylama emdeıtin dáriger sekildi jumys isteı almaıtynyn surady, sondaı-aq dárigerlik kolledjderde meıirbıkelerdi daıarlaý sapasyn qaıta qaraý máselesi de kóterildi. Syndarly únqatysý men pikir almasý boldy.
Senator Murat Baqtııaruly sharany qorytyndylaı kelip, Parlament pen barlyq múddeli organdardyń birlesken jumysyn odan ári jalǵastyrý mańyzdy dep sanaıtynyn jetkizdi.
