Álemdik aqparat keńistiginde ózindik orny bar «RIA novostı» agenttigi elimizde ótken Qazaqstan Respýblıkasy Prezıdentiniń saılaýy týraly jan-jaqty habar taratty. Agenttik: «О́tken jeksenbide, ıaǵnı 9 maýsym kúni Qazaqstanda kezekten tys prezıdenttik saılaý ótti. Ortalyq saılaý komıssııasynyń múshesi Lázzat Súleımen habarlaǵandaı, saılaýǵa el saılaýshylarynyń 77,4 paıyzy qatysty», dep jazdy.
Sonymen qatar agenttik prezıdenttik saılaýda Qasym-Jomart Toqaevtyń saılaýshylardyń basym bóliginiń senimine ıe bolǵanyna, ıaǵnı 70 paıyzdan astam daýysqa qol jetkizgenine basa nazar aýdarǵan.
Buǵan qosa, jańa Prezıdentti ulyqtaý rásimi aldaǵy 12 maýsym kúni ótetininen habardar ete otyryp, atalǵan saılaýda qazaqstandyq saılaýshylardyń joǵary deńgeıde belsendilik kórsetkenin, saıası naýqannyń laıyqty dárejede uıymdastyrylǵanyn, sondaı-aq sheteldik jáne jergilikti baıqaýshylardyń tyńǵylyqty jumysyn atap kórsetken.
Qytaı Prezıdenti Sı Szınpın Qasym-Jomart Toqaevty Qazaqstan Prezıdenti bolyp saılanýymen quttyqtady.
Quttyqtaý hatynda Sı Szınpın Qytaı men Qazaqstannyń tatý kórshi ekenin, ortaq senimge, mámilege jáne strategııalyq áriptestikke ıek artqan qarym-qatynas ornatqan el ekenin jetkizdi.
Qazirgi tańda ózara ortaq baılanys joǵary deńgeıge jetip, «Bir beldeý, bir jol» jobasynyń jemisin kórip otyrmyz. Bul adamzattyń keleshegine salynǵan dańǵyl, delingen Qytaı basshysynyń hatynda.
Sı Szınpın qazaq-qytaı qatynasynyń damýyna mańyz berip, Q.Toqaevpen tyǵyz baılanys ornatý arqyly ekijaqty baılanystyń odan ári damı beretinine senim bildirdi.
Qazaqstandaǵy qezekten tys Prezıdent saılaýy jónindegi aqparattar Túrkııanyń birqatar basylym betinen kórinis tapty. Baýyrlas eldiń buqaralyq aqparat quraldary elimizdegi Prezıdent saılaýyna halyqtyń jumyla qatysyp, óte joǵary deńgeıde ótkenin jarysa jazdy.
Euronews-tiń Túrkııadaǵy bólimi Prezıdent saılaýy kezinde halyqtyń kóńil kúıi kóterińki bolǵanyn, halyqpen birge Prezıdenttikke úmitkerler de týystary men áriptesterimen birge daýys bergenin jazady. Ár úmitker jóninde aqparat bere otyra, sheteldegi saılaý ýchaskeleri týraly da habarlaıdy.
Al Anadolý agenttigi elimizdegi saılaýdy jiti baqylap, sońǵy jańalyqtarymen bólisip, túrik halqyn habardar etip otyrdy. Saılaý bastalysymen Qazaqstan tarıhynda alǵash ret úmitker sanynyń kóp bolýyn, alǵash ret áıel úmitkerdiń dodaǵa qatysýyn jazady. Odan ári saılaý barysymen, sheteldik jáne halyqaralyq uıymdar atynan birqatar baıqaýshylardyń baqylap júrgeni týraly aqparat beredi. Exit-Poll nátıjesimen alǵashqylardyń biri bolyp bólisken sheteldik aqparat agenttigi de osy – Anadolý agenttigi. Sonymen birge TúrkPA Saılaý baıqaýshysy delegasııasynyń basshysy, halyq qalaýlysy Ismet Ýchmanyń pikirimen bólisedi. Onyń aıtýynsha, Qazaqstandaǵy kezekten tys Prezıdent saılaýy demokratııalyq túrde ashyq ári ádil ótken.
Túrik basylymdary men aqparat agenttikteri elimizdegi Prezıdent saılaýynda jeńiske jetken Qasym-Jomart Toqaevty quttyqtap, jumysyna sáttilik tiledi.
UzNews.uz portaly «Qazaqstandaǵy saılaýdyń nátıjesi – halyqtyń Qasym-Jomart Toqaevqa kórsetken tolyq senimi men keń qoldaýy, onyń eldiń ornyqty damýy men halyqaralyq bedelin arttyrýǵa qosqan úlesine zor baǵasy», dep jazdy. Sondaı-aq portal ekijaqty yntymaqtastyqty damytýǵa Qazaqstan Prezıdentiniń bıyl sáýir aıynda О́zbekstanǵa jasaǵan alǵashqy memlekettik sapary jańa serpin bergendigin, bul sapar kezinde dostyq, tatý kórshilik jáne strategııalyq áriptestik baılanysty nyǵaıtýǵa odan ári de beıildi ekenderi rastalǵanyn atap ótken.
Budan bólek, atalǵan portal Memleket basshylary telefon arqyly sóılesý barysynda ózbek-qazaq qarym-qatynasyn nyǵaıtýdy, sondaı-aq aımaqtyq jáne halyqaralyq kún tártibindegi ózekti máselelerdi talqylaǵanyn, buǵan qosa, joǵary deńgeıdegi, onyń ishinde halyqaralyq uıymdardyń sheńberinde aldaǵy kezdesýlerdiń kestesi qaralǵanyn jazdy.
Sheteldik basylymdar 2019 jyldyń 9 maýsymynda Qazaqstanda ótken kezekten tys Prezıdent saılaýy týraly kóp jazdy. Sonyń biri amerıkalyq The New York Times basylymy «Qazaqstan jańa kóshbasshysyn tańdady» degen taqyryppen kólemdi saraptamalyq aqparat jazdy.
Ortalyq saılaý komıssııasy saılaýda Nur Otan partııasynyń atynan qatysqan kandıdat Qasym-Jomart Toqaev eń kóp daýys jınaǵanyn jarııalady. «Jeksenbilik daýys berýdiń resmı nátıjeleri Nursultan Nazarbaev tóraǵalyq etetin partııa atynan qatysqan Qasym-Jomart Toqaev óziniń basty qarsylasyn, resmı túrde ruqsat etilgen oppozısııalyq kandıdat Ámirjan Qosanovtan aıtarlyqtaı basym túsken. Qasym-Jomart Toqaevqa jalpy elektorattyń 70,7 paıyzy daýys berse, Ámirjan Qosanov 16 paıyz daýys jınaǵan», dep jazady basylym.
Sonymen qatar The New York Times basylymy maqalada eldiń Tuńǵysh Prezıdenti Nursultan Nazarbaevtyń naýryz aıynda Qazaqstan Prezıdenti retinde ókilettiligin toqtatý týraly sheshim qabyldaǵany jaıynda da habardar etken.
Reseılik gazeta.ru saıty elimizde bıylǵy 9 maýsym kúni ótken prezıdenttik saılaý jóninde taratqan aqparattarynda qazaqstandyq sarapshylardyń pikirlerin negizge ala otyryp, atalǵan saılaýdyń tyńǵylyqty uıymdastyrylǵanyn ári barlyq úmitkerlerge teń múmkindikter berilgenin atap kórsetti.
«Qazaqstanda 9 maýsym kúni ótken prezıdenttik saılaýda Qasym-Jomart Toqaev saılaýshylardyń 70 paıyzdan astam daýysyna ıe bolyp, jeńiske jetti. Onyń basty qarsylasy sanalǵan úmitker 15 paıyz kóleminde daýys jınady. Qazaqstandyq sarapshylardyń aıtýynsha, jańadan saılanǵan Memleket basshysy eldiń Tuńǵysh Prezıdenti Nursultan Nazarbaevtyń buǵan deıin júrgizip kelgen ishki jáne syrtqy saıasatyn jalǵastyrmaq. Onyń ishinde Qazaqstan men Reseıdiń búgingi qatynasy da odan ári damı beredi», dep jazdy gazeta.ru saıty.
Sonymen qatar atalǵan saıt exit-poll nátıjelerine nazar aýdaryp, ózge úmitkerlerdiń kórsetkishterin atap kórsetken.
Budan bólek, saıt Qasym-Jomart Toqaevtyń myqty saıasatker, óz eliniń laıyqty da adal uly ekenin aıta kelip, onyń aldaǵy ýaqytta basymdyq beretin baǵyttaryna toqtaldy.
