Balalar úıinen soń aldymen Almatydaǵy pedýchılısheden bilim aldy. Shý aýdandyq komsomol komıtetinde istep, osy jerdegi aýdandyq gazettiń jaýapty hatshysy bolǵan. 1944-1947 jyldary Jambyl oblystyq «Stalındik jol» (qazirgi«Aq jol») gazetinde de jaýapty hatshylyq qyzmetin atqarǵan.
Qazaqstan Kompartııasy Ortalyq komıteti janyndaǵy eki jyldyq partııa mektebin bitirgen soń qazirgi Turar Rysqulov aýpartkomynyń nasıhat jáne úgit bólimin basqaryp, Kókterek (qazirgi Moıynqum) aýdandyq partııa komıtetiniń hatshysy, odan keıin Jambyl oblystyq atqarý komıteti tóraǵasynyń orynbasary boldy.
Al 1953-1956 jyldary Máskeýdegi joǵarǵy partııa mektebinde oqyǵan. Máskeýden Jambyl oblysyna qaıta oralyp, bes jyl boıy Jambyl qalalyq keńesi tóraǵasynyń orynbasary qyzmetin atqaryp, tórt jyl Kókterek aýdandyq atqarý komıtetiniń tóraǵasy, Shý aýdandyq partııa komıtetiniń hatshysy bolady. Sol sııaqty on jyl Jambyl oblystyq atqarý komıtetiniń áleýmettik qamsyzdandyrý bólimin basqarǵan. Mine, Tursynbala apaıdy halqymyzdyń bilimdi de bilikti qaıratker qyzynyń biri deýimizdiń syry osynda.
Tursynbala apamyzdyń eri, marqum Ábdiqul da birqatar laýazymdy qyzmettiń basyn ustaǵan ultjandy azamat edi. Ekeýi memlekettik isterdiń bel ortasynda júrip, Marııa, Sáýle, Záýre esimdi úsh qyz tárbıelep ósirgen, olardan birneshe nemere, shóbere súıip otyr. Dál osy tusta úlken kúıeý balasynyń belgili ǵalym, tarıh ǵylymdarynyń doktory, akademık Bolat Kómekov ekenin aıtqanymyzdyń da esh aıyby bolmas.
– Men osy uzaq ǵumyrymda, – deıdi Tursynbala Qasenqyzy, – adamgershiligi joǵary, adal, ádil, qoǵamshyl, aldymen ózin emes, elin oılaıtyn talaı jaısań jandy jaqsy adamdarmen birge júrdim, aralastym. Máselen, áıgili Jumabaı Shaıahmetovtyń qamqorlyǵyn, kómegin kórgenimdi aıryqsha atap ótkim keledi. Sol sııaqty qyzmettes bolǵan Izmuhamed Edilbaev, Asanbaı Asqarov, Ekeıbaı Qashaǵanovty qalaı umytaıyn! Ol kisilerdiń azbaıtyn aqylyn aldym, keremet keńesin tyńdadym, úlken úlgisin ustandym.
Myna 1952 jyly Almatyda túsirilgen sýrette Jambyl oblystyq atqarý komıteti tóraǵasynyń orynbasary Tursynbala Ábdiramanova (túregep turǵan) men Qaraǵandy oblystyq atqarý komıteti tóraǵasynyń orynbasary Fatıma Danenova jáne Qazaq KSR Mınıstrler Keńesi tóraǵasynyń orynbasary Maqpýza Nurymbaeva beınelengen.
...Bul kezde apamyz 29 jasta eken. Ushqyr ýaqytta toqtaý joq qoı. Sodan beri jyljyp jyldar, syrǵyp aılar ótipti. Jańa dáýir týyp, jańa zaman keldi. Qazaq eli táýelsizdik alyp, kemel keleshekke batyl bettep barady.
– Qudaıǵa shúkir,osy kúnge deıin jettim, – deıdi apamyz. – Endigi bar tilegim – el aman, jurt tynysh bolsyn!
Berikbaı QADYQOV,
jýrnalıst
