HINHUA aqparattyq agenttigi Qazaqstan Ortalyq saılaý komıssııasynyń aldyn ala qorytyndylaryna sáıkes, qazirgi el Prezıdenti Qasym-Jomart Toqaev saılaýda 70,96 paıyz daýys jınady, dep habarlady.
Sondaı-aq «Qazaqstannyń jańadan saılanǵan Prezıdenti Qasym-Jomart Toqaev dúısenbi kúni jýrnalıstermen kezdesý kezinde óziniń ınaýgýrasııasy 12 maýsymda ótetinin aıtty. Inaýgýrasııadan keıin el Prezıdenti Bishkekte ótetin Shanhaı yntymaqtastyq uıymy sammıtine barady», dep jazdy.
Sonymen qatar agenttik saılaýda Qytaı baıqaýshylarynyń: «Qazaqstandaǵy Prezıdent saılaýy halyqaralyq standarttarǵa saı uıymdastyryldy. Barlyq ýchaskelerde saılaý barysy ashyq ári demokratııaly túrde ótti. Eshqandaı da burmalaýshylyq tirkelgen joq», degen sózin keltirgen.
TREND aqparattyq agenttigi Qazaqstanda ótken kezekten tys prezıdenttik saılaýdyń bastalýynan bastap, sońǵy nátıjesine deıin egjeı-tegjeıli jazdy. Agenttik 2019 jylǵy 9 maýsymda ótken Qazaqstan Respýblıkasy Prezıdentiniń kezekten tys saılaýynyń nátıjeleri boıynsha Qasym-Jomart Toqaev 70,96 paıyz daýys jınaǵanyn atap kórsetken.
Sonymen qatar aqparattyq agenttik Ázerbaıjan Respýblıkasynyń prezıdenti Ilham Álıevtiń telefon arqyly Qasym-Jomart Toqaevty quttyqtaǵanyn atap kórsetti. «Ázerbaıjan Respýblıkasynyń Prezıdenti Ilham Álıev Qasym-Jomart Toqaevty Qazaqstan Respýblıkasynyń Prezıdenti saılaýyndaǵy aıqyn jeńisimen quttyqtap, joǵary memlekettik qyzmetine tabys tiledi», delingen aqparatta.
Sondaı-aq agenttik saılaý ashyq ári qalypty jaǵdaıda ótkenin habarlady. «Qazaqstanda ótken kezekten tys prezıdenttik saılaý el zańyna sáıkes jáne halyqaralyq tártipke saı ótti. Prezıdenttik saılaýǵa barlyǵy 7 kandıdat qatysty. Úmitkerler arasynda jalǵyz áıel adam boldy», dep jazdy.
Túrkııa aqparat agenttikteri elimizdegi saılaý barysynan aqparat taratyp, dúıim jurtty habardar etip otyrdy. TAKVIM gazeti saılaý ashyq ári ádil ótkenin atap kórsetti. Sonymen birge «Qoǵamdyq pikir» ınstıtýtynyń 325 saılaý ýchaskesinde 13 200 saılaýshyǵa saýaldama júrgizgenin, onyń nátıjesi boıynsha Qasym-Jomart Toqaevtyń 70,96 paıyz jınaǵanyn jazdy. Sonymen qatar basqa úmitkerlerdiń nátıjesimen bólise otyra, Qasym-Jomart Toqaevtyń mansaby týraly qysqasha aqparat berip ótti.
Túrkııanyń bedeldi gazeti «elde alǵash ret áıel úmitker Danııa Espaevanyń dodaǵa qatysýy Qazaqstandaǵy genderlik saıasattyń jolǵa qoıylǵanyn, áıel adamnyń qoǵamda oıyn ashyq bildire alatynyn kórsetti», degen sarapshylar pikirin keltirgen. Sonymen birge Danııa Espaevanyń: «Men Qazaqstan áıelderiniń atynan, kásipkerleriniń atynan saıysqa túsip otyrmyn», degen sózin de jazdy.
MILLIYET gazeti bolsa, prezıdenttikten úmitkerlermen, olardyń baǵdarlamalarymen tanystyrady. Odan ári basylym 9 274 110 adam qatysqan saılaýda Nur Otan partııasynyń ókili Qasym-Jomart Toqaevtyń jeńiske jetkenin málimdeıdi. 10 halyqaralyq uıymnan jáne birneshe memleketten baıqaýshylar baqylaǵany, oppozısııalyq kandıdat Ámirjan Qosanov 16,23% paıyzben ekinshi oryn alǵany týraly málimdeıdi.
Túrki tildes elder Parlamenttik Assambleıasynyń baıqaýshy komıssııasynyń múshesi, Qyrǵyzstan parlamentiniń depýtaty Ryskeldi Mombekovtiń onnan astam saılaý ortalyǵyna barǵanyn jáne saılaýdyń halyqaralyq standarttarǵa sáıkes tynysh jáne beıbit jaǵdaıda ótkizilgenin jazady.
IRAN PRESS aqparat agenttigi halyqtyń 77,4%-y qatysqan saılaýda úmitker Q.Toqaev 70,96%, al oppozısııa ókili Á.Qosanovtyń 16,23% daýys jınaǵanyn habarlady. Oppozısııa ókili Á.Qosanovtyń úmitkerler qatarynan kórinýi sheteldik basylymda erekshe nazarǵa alynyp, keńinen talqylandy.
«19 naýryzda Qazaqstannyń Tuńǵysh Prezıdenti Nursultan Nazarbaev ókilettigin toqtatty. Odan keıin memleket basyna kelgen Qasym-Jomart Toqaev kezekten tys saılaý bolatynyn málimdedi. 7 úmitker qatysqan saılaýda Q.Toqaevtyń jeńetinine esh kúmán bolǵan joq», dep jazady atalǵan aqparat agenttigi. Sonymen birge sheteldik agenttik saılaýǵa halyq belsene atsalysyp, kóterińki kóńil kúıde bolǵanyn atap kórsetti.
Qazaqstanda ótken Prezıdent saılaýy týraly habarlar Eýropanyń eń oqylymdy baspasóz betterinde jaryq kórdi. Sonyń biri Fransııanyń salmaqty basylymy Le Monde gazeti Qasym-Jomart Toqaevtyń saılaýshylardyń 70 paıyzdan joǵary daýysyna ıe bolyp, jeńiske jetkenin jazdy. «Ortalyq Azııada ózindik orny bar el – Qazaqstandaǵy kezekten tys ótkizilgen bul saıası naýqan eldiń damý baǵdaryna jańa serpin beretini kúmánsiz», deıdi basylym.
Sondaı-aq gazet saılaýshylardyń 77,4 paıyzy daýys bergenin jazyp, basqa kandıdattardyń da qansha daýys jınaǵanyna, onyń ishinde kimderdiń kórsetkishi joǵary bolǵanyna toqtalǵan. Mysaly, Qasym-Jomart Toqaevtan keıin ekinshi orynǵa turaqtaǵan Ámirjan Qosanovtyń 16,23 paıyz daýys jınaǵanyn bólek atap, bul osy ýaqytqa deıingi el tarıhynda ótken saılaýlarda basty kandıdatqa qarsylas bolǵandardyń arasyndaǵy eń joǵary nátıje ekenin ataǵan.
Reseı astanasy Máskeýdiń bas basylymy Qazaqstandaǵy saılaý naýqanynyń ár jańalyǵyn qalt jibermeı, oqyrman nazaryna usynyp otyrdy. Onda Ortalyq saılaý komıssııasy jarııalaǵan kandıdattardyń kórsetkishin shyǵaryp, eldiń qazirgi Prezıdenti Qasym-Jomart Toqaevtyń aıqyn basymdyqpen jeńiske jetkenin habarlady.
Buǵan qosa, «Vechernıaıa Moskva» gazeti Qazaqstandaǵy saılaýǵa qatysty sarapshylardyń kózqarastaryn surap bilgen. Aıtalyq, Halyqaralyq jańa memleketter ınstıtýtynyń dırektory Alekseı Martynov Qazaqstanda ótken Prezıdent saılaýy eldiń aldaǵy damý barysyn aıqyndaǵan núktesi dep sanaıdy. Onyń aıtýynsha, bul saılaýdyń ereksheligi – eldiń Tuńǵysh Prezıdentiniń qatysýynsyz ótkeni jáne oppozısııa ókiliniń buǵan deıingilerdiń ishinde joǵary paıyzǵa ıe bolǵany. Saıasattanýshy jańa Memleket basshysy Reseımen tatý kórshilik qarym-qatynastardy jalǵastyrady jáne damyta beredi degen pikirin keltirgen. О́ıtkeni Qazaqstannyń órkendeýine yqpal etken Nursultan Nazarbaevtyń júrgizgen salıqaly saıasatyn jalǵastyrý – aldaǵy ýaqytta da týra jolǵa bastaı bermek.
