– Azııadaǵy ózara is-qımyl jáne senim sharalary keńesiniń sammıtine keler bolsaq, Siz osy forýmnyń basynda turdyńyz jáne onyń bastamashylarynyń biri boldyńyz. Tuńǵysh Prezıdentimiz – Elbasy Nursultan Ábishuly Nazarbaev 1992 jyly Birikken Ulttar Uıymynyń minberinen osyndaı usynys jasaǵan bolatyn. Sol bastama qoldaý taýyp, sodan beri bul úderis tabysty damyp keledi. Sizdiń osy uıymnyń damýyna zor úles qosqanyńyzdy taǵy da atap ótkim keledi. Al, qazir, is júzinde osy jıyndy basqaryp otyrsyz, – dedi Memleket basshysy.
Qasym-Jomart Toqaev Qazaqstan men Tájikstannyń kópqyrly qurylymdar men halyqaralyq uıymdarda bir-birine qoldaý kórsetip kele jatqanyn aıtyp, osy yqpaldastyqty jalǵastyra berýge nıetti ekenin jetkizdi.
Tájikstan Prezıdenti Qasym-Jomart Toqaevqa iltıpat bildirip, Qazaqstan Respýblıkasynyń Prezıdenti bolyp saılanǵannan keıingi birinshi jumys sapary ekenin atap ótti.
– Eń aldymen, Sizdi Qazaqstan Respýblıkasynyń Prezıdenti bolyp saılanýyńyzben quttyqtaımyn. Josparlaryńyz ben bastamalaryńyzdyń tabysty júzege asýyna tilektespin. Saılaý qorytyndysy halqyńyzdyń Qazaqstannyń ishki jáne syrtqy saıası baǵdaryn júzege asyrý isindegi sabaqtastyqty qoldaıtynyn taǵy da dáleldedi, – dedi Emomalı Rahmon.
Tájikstan kóshbasshysy Qazaqstanmen yntymaqtastyqtyń óz memleketiniń syrtqy saıasatynda mańyzdy orynǵa ıe ekenin atap ótti. Onyń paıymdaýynsha, birlesken kúsh-jigerdiń arqasynda eki el arasyndaǵy strategııalyq áriptestik bolashaqta da jemisti damı beredi.
Kelissózder sońynda taraptar Dýshanbe sammıtiniń qatysýshy elder úshin Keńes sammıtiniń aralyq jumysynyń qorytyndysyn shyǵarýǵa, aımaqtaǵy turaqtylyq pen qaýipsizdikti qamtamasyz etý máseleleri jóninde pikir almasýǵa jáne bolashaqtaǵy baǵyttary men basymdyqtaryn aıqyndaýǵa múmkindik beretinin atap ótti.
Resmı kezdesýden keıin Emomalı Rahmon Qasym-Jomart Toqaevqa óziniń rezıdensııasy – Ult saraıyn tanystyrdy.
