О́z kezeginde sóz alǵan Memleket basshysy Qasym-Jomart Toqaev Azııadaǵy ózara is-qımyl jáne senim sharalary jónindegi keńes qurlyqtyń tarıhynda jańa kezeńdi ashyp, Azııadaǵy qaýipsizdikti qamtamasyz etýdiń negizgi kózine aınalǵanyn aıtty.
«Forýmnyń geografııasyn keńeıtý onyń halyqaralyq arenadaǵy róli men bedelin arttyrdy. Búgingi kúni AО́SShK - Azııalyq aımaqtyń 35 memleketi men ǵalamshardyń jartysyna jýyǵyn biriktiretin bedeldi, kópjaqty qurylym» dedi el Prezıdenti.
Sondaı-aq Q. Toqaev keńesti shaqyrý ıdeıasyn Qazaqstan Respýblıkasynyń Tuńǵysh Prezıdenti - Elbasy Nursultan Nazarbaev 1992 jyly 5 qazanda BUU Bas Assambleıasynyń 47-shi sessııasynda jarııa etkenin aıtyp ótti. «AО́SShK-ti ótkizý ıdeıasy bizdiń kontınentimizdiń tarıhynda jańa kezeń ashyp, Azııadaǵy qaýipsizdikti qamtamasyz etýdiń birden-bir faktoryna aınaldy», dedi Qasym-Jomart Toqaev.
Sonymen qatar el Prezıdenti barlyq memleketti Azııadaǵy ózara is-qımyl jáne senim sharalary keńesiniń tıimdiligin odan ári arttyrýǵa shaqyrdy.
