Qasym-Jomart Toqaev Elbasy Nursultan Nazarbaevtyń ınklıýzıvti damýdyń jahandyq arhıtektýrasyn qalyptastyrý jónindegi «Úsh dıalog» týraly bastamasynyń ózektiligin atap ótti. Memleket basshysy bul ıdeıanyń quramdas bóligi Eýrazııa aýqymyndaǵy ózara is-qımyldardyń josparyn jasaý úshin Azııadaǵy ózara is-qımyl jáne senim sharalary jónindegi keńestiń jáne Eýropadaǵy qaýipsizdik jáne yntymaqtastyq uıymynyń, sodan keıin Azııa men Eýropadaǵy basqa da óńirlik ári kópjaqty ınstıtýttardyń áleýetteriniń sınergııasyn qamtamasyz etý bolyp sanalatynyn aıtty.
– Daýly problemalar men qarama-qaıshylyqtardy bastalǵan sátinde sheshý úshin konstrýktıvti kelissózderdi qamtamasyz etý – kún tártibindegi basty máselelerdiń biri. Sondyqtan, jaqyn arada Azııadaǵy ózara is-qımyl jáne senim sharalary jónindegi keńes aıasynda halyqaralyq medıasııany júzege asyratyn tolyqqandy ujymdyq qaýipsizdik júıesi qurylýy ábden múmkin, – dedi Qazaqstan Prezıdenti.
Aıta keteıik, búgin Dýshanbede Azııadaǵy ózara is-qımyl jáne senim sharalary keńestiń besinshi sammıti ótip jatyr. Oǵan Memleket basshysy Qasym-Jomart Toqaev qatysýda.
Sondaı-aq bul aýqymdy sharaǵa onnan astam eldiń Prezıdenti men Úkimet basshylary keldi. AО́SShK quramynda 27 múshe-memleket: Aýǵanstan, Ázerbaıjan, Bangladesh, Bahreın, BAÁ, Vetnam, Izraıl, Iordanııa, Irak, Iran, Qazaqstan, Kambodja, Katar, Qyrǵyzstan, Qytaı, Mysyr, Mońǵolııa, Palestına, Pákistan, Koreıa Respýblıkasy, Reseı, Tájikstan, Taıland, Túrkııa, О́zbekstan, Úndistan, Shrı-Lanka bar. Sondaı-aq AО́SShK-ni shaqyrý týraly ıdeıa birqatar memleketterden jáne BUU, EQYU, AML (Arab memleketteri lıgasy), TúrkPA, Halyqaralyq kóshi-qon uıymy sııaqty halyqaralyq uıymdardan qoldaý tapty.
