Elimizde qazir týrızmdi damytý jumystary qolǵa alynýda, bul baǵytta negizinen bitken isten bitirer is kóp deýge bolady. Týrızmdi túletý barysynda áli talaı tyń ıdeıalar týyndap, nebir qyzyqty jobalardyń tusaýyn kesýi ǵajap emes jáne bul alys-jaqyn bolashaqtyń enshisindegi oljalarymyz deı turaıyq, tipti ol búgingi jas býynnyń qolymen atqarylýy da ábden múmkin.
Dalasy sulý kórinisterge tolǵan, tylsym syrlary tunǵan Mańǵystaý – Qazaqstannyń týrıstik aımaǵy sanalatyn úzdik ondyqqa enedi, ıaǵnı týrıstik áleýeti joǵary aımaq qatarynda.
Alaıda toǵyz joldyń torabyna aınalǵan, tórt taraptyń keń dálizi Mańǵystaýda atalmysh sala tynysyn keńinen alyp, qulashyn keńge jaıyp kete alǵan joq. Ál jetpeı me, áleýet jetpeı me, álde qarajattan qysylý bar ma, joq bilik olqy soǵyp kele me? Áıteýir, bardy uqsatýda dúrk kótirilip kete almaı turǵanymyz aqıqat.
Aqtaýdaǵy óńirlik kásipkerler palatasynda ótken basqosýda kóptiń kókeıindegi osy másele tilge tıek boldy. Rasynda, ǵajap jerlerge týrızmdi damytýǵa ne kedergi? Saıahatshylardy ólkege kóptep tartý úshin qandaı jobalar júzege asýy kerek?
– Aqtaý qalasy men Quryq parom kesheni aralyǵyn qamtıtyn aýmaqtaǵy týrızmdi damytýǵa respýblıkalyq bıýdjetten 18 mlrd teńge bólindi. Sonymen qatar jaǵajaı demalysyn damytý basty nazarda. Oǵan osyndaǵy ınfraqurylym jasaqtalyp, Aqtaý men «Alaý» lageri joldary jóndeletin bolady, – deıdi «Kazakh Turism» ulttyq kompanııasynyń basqarma tóraǵasy О́.Bısaqaev.
Jaǵajaı týrızmin damytý jáne balalar demalysyn, ıaǵnı balalar týrızmin damytý – óńirde jıi aıtylyp kele jatqan jaǵdaı. Qazirgi tańda týrızmdi damytýǵa qatysty jasalyp jatqan jumystardyń kóbi osy baǵyttarǵa saıady.
«Atameken» UKP Basqarma tóraǵasynyń orynbasary O.Ordabaevtyń aıtýynsha, Mańǵystaý týrızmin damytý úshin aldymen týrısterdi kútip alý talaptaryn jetildirý kerek. Áýejaı men temir jol vokzalynyń daıyndyǵy qandaı? Sondaı-aq avtokólik joldary boıynda týrısterge servıstik qyzmet kórsetý qaı deńgeıde? «Saıahatshylardy qarapaıym shaıhanamen emes, qyzyqty, tyń jobalarmen tartýdy oılastyrý kerek. «Jobalaý ofısi» jobasy osy jaıttardy júzege asyrýǵa múmkindik beredi» deıdi ol. Shyndyǵynda, alys joldar boıyndaǵy servıstik qyzmet kórsetetin oryndardyń sany da, sapasy da syn kóteretindeı emes. Tyń jobalar bylaı tursyn, aıtsań uıat, aıtpasań bolmaıtyn eń qarapaıym nárse – ájethanalardyń ahýaly-aq adam shoshyrlyq halde. Bul «árkim baratyn jer» – negizi barlyq nysanda, barlyq orynda, tipti jol boılarynda da jańǵyryp, tazalyq pen mádenıettiń naqty kórinisi bola alsa ǵoı!
Dóńgelek ústelde týrıstik aıtaqtarǵa halyqty tartý úshin ishki áýe qatynastaryn ońtaılandyrý usynyldy. Mektep demalysy maýsymynda balalar bıletterin sýbsıdııalaý, bir eresek adamǵa eki balany tegin alyp júrý jaǵdaıyn qarastyrý týrasynda pikir aıtyldy. Sonda otbasy bıýdjeti 30 paıyzǵa únemdelip, halyq shetelge emes, otandyq týrıstik jerlerge ynta bildiredi eken. Týr-polısııa qyzmetin qurý, avto kerýen, medısınalyq týrızm, balalar týrızmi, ózge de jumystardy damytý ýaqyt enshisinde jáne munyń bári Qazaqstandy týrıstik tartymdylyǵy bar 50 eldiń qataryna qosý mindetin júzege asyrýǵa kómektespek.
– Iran men Túrikmenstan sııaqty kórshiles elderge reıs asha almaı otyrmyz. Nıet bildirgen kompanııalarǵa ruqsat berilmedi. Kórshi Ázerbaıjanda bul másele joq. Irandyq týrıster Bakýde vızasyz júr. Bakýge týrıster tolassyz keledi. Qosymsha reıster uıymdastyryp jatamyz. Bizge nege sondaı jaǵdaı jasamasqa? Sondaı-aq týrısterdi tirkeý áýejaı ǵımaratynda bolýy kerek, olar kóp ýaqytyn qujattarmen áýre-sarsańǵa jumsamaýy tıis. Ishki reısterdi sýbsıdııalaý jedeldetip qolǵa alynsa eken. Jaz mezgilinde Atyraýdan kúnine 4 reıs jasalady. Osyndaı suranys elimizdiń barlyq aımaǵynan, jaqyn shetelderden de túserine senim mol, – deıdi Aqtaý halyqaralyq áýejaıynyń dırektory E.Joldasov.
Basqosýdyń ortaq aıtary Úkimetke joldanbaq. Múmkin, óńirde keleshekti kútpeı, qazir-aq sheshilý jolary tabylyp turǵan týrızmdi damytýǵa qatysty irili-usaqty máselelerdiń birqatary sheshimin taýyp qalar degen oıdamyz.
Mańǵystaý oblysy
