Bıylǵy jıynda «Túrki órkenıeti: túp tamyrynan qazirgi zamanǵa deıin» taqyrybyna arnalyp otyr. Forýmda qazaqstandyq ǵalymdarmen qatar Eýropa, Azııa jáne Amerıka qurlyǵynyń 21 elinen 250-ge jýyq tanymal ǵalymdar men belgili memleket jáne qoǵam qaıratkerleri bas qosady.
Forýmǵa Mońǵolııanyń tuńǵysh prezıdenti Pýnsalmaagıın Ochırbat, Ázerbaıjan Respýblıkasynyń tuńǵysh premer-mınıstri Gasan Gasanov, Qyrǵyzstan Respýblıkasy prezıdentiniń keńesshisi Sýltan Raev, Túrkııa Respýblıkasy Parlamentiniń eksdepýtaty jáne belgili saıasatker Namyk Kemal Zeıbek pen Qyrǵyzstan Respýblıkasy Joǵarǵy keńesiniń tuńǵysh tóraǵasy Medetkan Sherımkýlov arnaıy keledi.
Forým «Túrki memlekettiginiń qalyptasý men damý tarıhy», «Túrki áleminiń genezısi - Uly dala tarıhyndaǵy jańa dáýir», «Túrki áleminiń ádebıeti men folklortanýyndaǵy ózekti máseleler», «Túrki áleminiń etnomádenı erekshelikteri», «Qazirgi túrkitaný: jańa kózqarastar men tásilder» jáne «Eýrazııadaǵy ıntegrasııalyq úrdister: keńistik pen ýaqyttyń kókjıekteri» degen 6 taqyryptyq seksııaǵa bólingen.
Halyqaralyq jıynnyń basty mindeti – sheteldik jáne otandyq túrkolog ǵalymdar arasynda álemdik túrkitaný ǵylymynyń qazirgi jaǵdaıyna, jetistikterine, problemalary men damý keleshegine taldaý jasaý, Uly dalanyń mádenı qundylyqtarynyń adamzat órkenıetiniń damýyndaǵy róli men mańyzyn talqylaý. Sondaı-aq Qazaqstan Respýblıkasynyń Tuńǵysh Prezıdenti – Elbasy N.Á.Nazarbaevtyń «Uly Dalanyń jeti qyry» baǵdarlamalyq maqalasy negizinde tujyrymdalǵan strategııalyq maqsattar sheńberinde túrki álemi mádenı qundylyqtarynyń jalpyadamzattyq mańyzy men róline taldaý júrgizip, talqylaý da forýmnyń aldyna qoıǵan basty maqsaty.
Halyqaralyq basqosý álemdik tanymal mamandar arasyndaǵy ǵylymı baılanystardy nyǵaıtý, pikir almasý, jahandyq jáne óńirlik deńgeıdegi ózekti máselelerdi sheshý boıynsha keńester usynatyn alań qyzmetin atqarmaq.
Forým jumysynyń qorytyndysy boıynsha Qazaqstan jáne túrkitildes memleketterdiń qoǵamdyq sanasyn jańǵyrtýdyń ózekti baǵyttary boıynsha zertteý formattaryn naqty belgileý; qazirgi Túrk álemine qatysty jańa zertteýlerdiń damýyna áser etetin aǵymdardy zerdeleý, sondaı-aq, túrkologııa jáne áleýmettik ǵylymdardyń basqa pánderin qamtıtyn obektıvti kózqarastardy anyqtaý; ózara túsinistik pen konstrýktıvti yntymaqtastyqty nyǵaıtýda ǵylymnyń ıntegrasııalyq áleýetin qabyldaý negizinde tıisti qorytyndy qarar qabyldaý syndy naqty nátıjeler kútilip otyr.
