Qasym-Jomart Toqaev Qazaqstan astanasyna kelgen Stanıslav Zasqa iltıpat bildirip, Ujymdyq qaýipsizdik shart uıymynyń óńirdegi beıbitshilik pen qaýipsizdikti saqtaýda mańyzy zor ekenin atap ótti. Sondaı-aq, Qazaqstan Ujymdyq qaýipsizdik shart uıymynyń Bas hatshysy laýazymyna Belarýstiń kandıdatýrasyn basynan bastap qoldaǵanyn aıtty.
– Ujymdyq qaýipsizdik shart uıymy halyqaralyq uıym retinde Eýrazııa qurlyǵynyń aýqymdy keńistiginde qaýipsizdikti qamtamasyz etýdiń eleýli faktoryna aınalyp, nyǵaıdy. Ujymdyq qaýipsizdik shart uıymy biz úshin – mańyzdy uıym. Belarýs sııaqty biz de ony damytýǵa zor úles qostyq. Ujymdyq qaýipsizdik shart uıymynyń Parlament Assambleıasynda belsendi jumys isteımiz. Sizdiń aldaǵy ýaqyttaǵy taǵaıyndalýyńyz uıymnyń áleýetin nyǵaıtý turǵysynan mańyzdy ról atqarady, – dedi Qazaqstan Prezıdenti.
Stanıslav Zas Qasym-Jomart Toqaevqa kezdeskeni úshin alǵys aıtyp, saılaýdaǵy jeńisimen jáne Qazaqstan Respýblıkasynyń Prezıdenti qyzmetine kirisýimen quttyqtady.
– Qazaqstan halqy Siz sııaqty jan-jaqty ári mol tájirıbesi bar memleket qaıratkeri bolyp qalyptasqan aqyldy adamdy durys tańdady. Qazaqstannyń ıgiligi jolyndaǵy barlyq isińizge tabys tileımin. Biz memleketterimiz ben halyqtarymyz arasynda qalyptasqan dostyq qatynastardy joǵary baǵalaımyz jáne Qazaqstannyń halyqaralyq alańdarda, sonyń ishinde Ujymdyq qaýipsizdik shart uıymynda Belarýske kórsetken qoldaýy úshin rızashylyǵymyzdy bildiremiz. О́zara paıdaly is-qımyldardy nyǵaıta berýge tyrysamyz, – dedi Stanıslav Zas.
