Jetimderdiń aýzynan jyryp jegen balalar úıiniń 9 qyzmetkeri jazaǵa tartyldy
Seısenbi, 28 mamyr 2013 2:59
Bul – balalar úıindegi óreskeldik. Ashyp aıtqanda, Sandyqtaý balalar úıiniń ákimshiligi men pedagogtary «Qazaqstan Respýblıkasyndaǵy balalar quqyǵy týraly» Zańdy qaperge almaıtyndyǵy anyqtalyp otyr. Máselen, QR Densaýlyq saqtaý mınıstrliginiń 2009 jylǵy №685 buıryǵyna sáıkes, tárbıelenýshiler jylyna eki ret skrınıngtik tekserýden ótýi tıis bolsa, byltyr 91 balanyń 31-i ǵana profılaktıkalyq baıqaýǵa tartylǵan.
Seısenbi, 28 mamyr 2013 2:59
Bul – balalar úıindegi óreskeldik. Ashyp aıtqanda, Sandyqtaý balalar úıiniń ákimshiligi men pedagogtary «Qazaqstan Respýblıkasyndaǵy balalar quqyǵy týraly» Zańdy qaperge almaıtyndyǵy anyqtalyp otyr. Máselen, QR Densaýlyq saqtaý mınıstrliginiń 2009 jylǵy №685 buıryǵyna sáıkes, tárbıelenýshiler jylyna eki ret skrınıngtik tekserýden ótýi tıis bolsa, byltyr 91 balanyń 31-i ǵana profılaktıkalyq baıqaýǵa tartylǵan.
Respýblıkamyzdyń «Bilim týraly», «Neke jáne otbasy týraly» zańdary da bul mekemeni aınalyp ótkendeı eken. Prokýrorlyq tekseris barysynda osyndaǵy ustazdardyń 30 paıyzy lısenzııalyq talaptarǵa sáıkes bolmaı shyqty. Onyń ústine, 2012 jyldyń qarashasynan beri psıholog pen ádiskerdiń orny bos tur. Mundaı jaǵdaıda bilim berý men tárbıe isiniń sapasy jaıly kóńil kónshiterlik áńgime bolmasy haq.
Taǵdyrdyń tálkegine túsip, onsyz da júregi jaralanǵan balalardyń kóńiline qaıaý túsiretin mynadaı jaǵdaılarǵa ne der edińiz? Zań talaptary boıynsha balalar úıiniń ákimshiligi sábılerinen bas tartqan ata-analardy quqyǵynan aıyrý jóninde tıisti organdarǵa usynys jasaýy qajet. Bul oraıda da nemquraıdylyq etek alǵan. Mysaly, 1997 jyly týǵan F.-niń anasy sábıinen bas tartatyndyǵy jóninde 2003 jylǵy 8 mamyrda jazǵan aryzy áli kúnge qozǵaýsyz jatyr. Al, M.-nyń anasy analyq quqyǵynan 2005 jyly aıyrylsa da, onyń kámelettik jasqa tolmaǵan statýsy jeti jyl boıy belgilenbegen. Onyń anasy byltyr qaıtys bolǵanymen, ákesi týraly eshqandaı qujat joq. Sondaı-aq, Jaqsy aýdanyndaǵy Alǵabas aýylynyń turǵyny 2012 jylǵy 11 qazanda S.-ny asyrap alǵanymen, eki aıdan keıin kózin jáýdiretip qaıta ákelip tastapty. Bul tárbıelenýshini ózgeniń qamqorlyǵyna bermesten aldyn ala tıisti keshendi zertteý jumystary júrgizilmegendigin áıgileıdi.
Oblys prokýratýrasy osyndaǵy 84 balanyń bireýi ǵana alıment alatyndyǵyn dabyl etip kóterdi. Buǵan qosa N. degen áleýmettik pedagog kámelettik jasqa tolmaǵan K.-niń esepshotyndaǵy 11700 teńgeni jeke basyna paıdalanǵany anyqtaldy.
Prokýror pármenimen oblystyq bilim basqarmasy Sandyqtaý balalar úıiniń dırektory M.Moldahmetov pen 8 laýazymdy tulǵany ákimshilik jaýapkershilikke tartty.
Baqbergen AMALBEK,
«Egemen Qazaqstan».
Aqmola oblysy.
