Reseı Federasııasynyń Prezıdenti Vladımır Pýtın Nursultan Nazarbaevty týǵan kúnimen quttyqtady.
«Sizdiń mol tájirıbeńiz, saıası danalyǵyńyz jáne tereń bilimińiz eýrazııalyq keńistiktegi ıntegrasııalyq úderister boıynsha strategııalyq seriktestik pen odaqtastyq qarym-qatynastardy damytý isinde árdaıym qajet bolatynyna senimdimin», – dedi V.Pýtın.
Qytaı Halyq Respýblıkasynyń Tóraǵasy Sı Szınpın óziniń jedelhatynda Qytaı men Qazaqstan arasyndaǵy qatynastardy damytýdyń mańyzdylyǵyn atap ótti.
«Qytaı men Qazaqstan dostas kórshi jáne jan-jaqty strategııalyq áriptes bolyp sanalady. Eki el arasyndaǵy dıplomatııalyq qarym-qatynastar ornaǵan 27 jyl ishinde Qytaı-Qazaqstan baılanystary qarqyndy damyp keledi. Memleketterimizdiń saıası ózara senimi úzdiksiz nyǵaıyp, «Bir beldeý, bir jol» birlesken bastamasy dáıekti túrde tereńdeı túsýde, sondaı-aq halyqaralyq yntymaqtastyǵymyz asa tıimdi ári tyǵyz yqpaldastyqta júzege asyrylýda. Bıylǵy sáýirde Siz saparmen Qytaıǵa kelip, «Bir beldeý, bir jol» atty joǵary deńgeıdegi ekinshi halyqaralyq yntymaqtastyq forýmyna qatystyńyz, sapar qorytyndysynda jemisti nátıjelerge qol jetkizildi.
Men Sizben dostyq kelissózder júrgizip, Qytaı Halyq Respýblıkasynyń «Dostyq» ordenimen marapattadym. Sol arqyly Qytaı-Qazaqstan qarym-qatynastarynyń joǵary jáne erekshe deńgeıde ekenin atap óttim», delingen jedelhatta.
О́zbekstan Respýblıkasynyń Prezıdenti Shavkat Mırzııoev ózbek halqynyń Elbasyn ózin eli men halqyna jan-tánimen qyzmet etýge arnaǵan kórnekti memleket qaıratkeri jáne álemdik deńgeıdegi parasatty saıasatker retinde tereń qurmetteıtinin atap ótti.
«Tarıhtyń eń qıyn ári kúrdeli kezeńinde Sizdiń memleket keleshegine jaýapkershilik alǵanyńyz Qazaqstan úshin taǵdyrsheshti oqıǵa boldy. Siz – biregeı adamı qasıetke ıe, tereń bilimdi, baǵa jetpes kásibı jáne ómirlik tájirıbesi bar týa bitken kóshbasshysyz.
Sizdiń Qazaqstan Respýblıkasynyń Tuńǵysh Prezıdenti – Elbasy retinde Qazaqstan memleketin, elińizdiń egemendigi men táýelsizdigin qalyptastyrý jáne nyǵaıtýdaǵy tarıhı mıssııańyzǵa berilgen shynaıy joǵary baǵany tolyq qoldaımyn», – delingen jedelhatta.
Qyrǵyz Respýblıkasynyń Prezıdenti Sooronbaı Jeenbekov óziniń hatynda Elbasynyń arqasynda Qazaqstannyń astanasy Ortalyq Azııadaǵy eń ásem qala atanyp, halyqaralyq qarjy alańy men beıbitshilik qalasyna aınalǵanyn atap ótken.
«Sizdiń týǵan kúnińizge jáne Qazaqstan Respýblıkasynyń astanasy kúnin merekeleýge oraı meniń shynaıy quttyqtaýymdy qabyl alyńyz.
Siz – ózińizdiń zor kúsh-jigerińizben jáne ıgi isterińizdi Qazaqstan halqynyń ǵana emes, sondaı-aq búkil Ortalyq Azııa halyqtarynyń ál-aýqatyn arttyrýǵa baǵyttaǵan dana ári parasatty tulǵasyz.
Qazaqstan halqy táýelsizdik alǵannan beri elińizde bolyp jatqan barlyq eleýli áleýmettik-ekonomıkalyq reformalardy Sizdiń esimińizben baılanystyrady jáne halyqtyń ósip-órkendeýine qosqan zor úlesińizdi joǵary baǵalaıdy», – delingen hatta.
Belarýs Respýblıkasynyń Prezıdenti Aleksandr Lýkashenkonyń jedelhatynda Tuńǵysh Prezıdenttiń saıası baǵdarynyń arqasynda Qazaqstan Respýblıkasy tabysty, qýatty jáne táýelsiz memleketke aınalǵany aıtylǵan.
«Sizdiń Belarýs-Qazaqstan yntymaqtastyǵyn damytý máselelerine kóńil bólip, halyqtarymyzdyń arasyndaǵy kópjyldyq dostyq dástúrdi, ózara qurmet pen baýyrlastyq qarym-qatynastardy nyǵaıtýǵa qosqan jeke úlesińiz úshin shynaıy rızashylyqtamyn. Ulttyń shyn mánindegi kóshbasshysy, óz halqyna adaldyqtyń úlgisi bola otyryp, Siz memlekettiń damýy men órkendeýi úshin talmaı eńbektenip kelesiz», – delingen jedelhatta.
Túrikmenstan Prezıdenti Gýrbangýly Berdimuhamedov óziniń quttyqtaýynda Qazaqstan ómiriniń barlyq salasynda aýqymdy ózgerister men eldiń aıtarlyqtaı jetistikteri Tuńǵysh Prezıdent – Elbasy atymen tyǵyz baılanysty ekenin atap ótti.
«Biz Túrikmenstanda Sizdiń elderimizdiń arasyndaǵy qarym-qatynastardy damytýǵa qosqan jeke úlesińizdi joǵary baǵalaımyz jáne kóp jylǵy tatý kórshilik, senim men qurmetke negizdelgen ekijaqty strategııalyq yntymaqtastyqty odan ári nyǵaıtýǵa nıettimiz.
Osy ataýly kúni shyn júrekten Sizge zor densaýlyq, uzaq ómir, sarqylmas kúsh-qýat, mol baqyt, al baýyrlas Qazaqstan halqyna beıbit ómir tilep, odan ári ósip-órkendeı berýine tilektestik bildiremin», – delingen jedelhatta.
Serbııa Prezıdenti Aleksandr Výchıch Qazaqstannyń Tuńǵysh Prezıdentiniń kóregen saıasatynyń arqasynda Qazaqstannyń qol jetkizgen jetistikterine toqtaldy.
«Osy múmkindikti paıdalanyp, Serbııa men Qazaqstannyń tyǵyz yntymaqtastyqqa qol jetkizýi jolyndaǵy jan-jaqty nıettestik úshin taǵy da alǵys bildirgim keledi. Elderimizdiń qarym-qatynastaryn odan ári nyǵaıtýǵa kóp múmkindiktiń bar ekenine senimim mol», – delingen hatta.
Qazaqstannyń Tuńǵysh Prezıdentin Tájikstan Respýblıkasynyń Prezıdenti Emomalı Rahmon da quttyqtady.
«Týǵan-týysqandaryńyz, jaqyndaryńyz ben dostaryńyz úshin osy aıtýly kúnde Sizge shyn júrekten zor densaýlyq, baq-bereke, amandyq, О́zińizge zor qurmetpen qaraıtyn Qazaqstan halqynyń ıgiligi jolynda taýsylmas qúsh-qaırat pen jańa jetistikter tileımin.
Osy múmkindikti paıdalanyp, Tájikstan men Qazaqstan arasyndaǵy ózara qarym-qatynastardy strategııalyq áriptes retinde tabysty damyp kele jatqanyn atap ótkim keledi», – delingen jedelhatta.
