«Qazir osy alań elimizdiń ár óńirinen jáne jaqyn shetelden kelgen eń daryndy, ári bastamashyl jastardyń basyn qosyp otyr. Árqaısyńyz óz jobalaryńyzdy tanystyryp, onyń múmkindikteri men áleýetteri týraly aıtyp qana qoımaı, sonymen qatar tájirıbe jınap, úzdik bıznes-tálimgerlerden, koýchtar men sarapshylardan bilim ala alasyzdar. Lagerdegi qarqyndy bilim alý kúnderi óz joldaryńyzdy tabýǵa jáne óz-ózderińizge degen senimderińizdi arttyrýǵa kómektesedi. «Zeren-2019» oılaryńyzdan shyǵyp, jańa jobalar men bastamalaryńyzdy júzege asyrýǵa múmkindik beretinine senimdimin», - dep Dáýren Abaev jastarmen kezdesý kezinde pikir bildirdi.
Lagerge 50-den astam qazaqstandyq jáne halyqaralyq sarapshy jınaldy. Olardyń qatarynda óz bilimi men tájirıbesin jastarmen bólisýge daıyn bıznes, akademııalyq qaýymdastyqtardyń, ÚEU-nyń, startaptardyń, jetekshileri men ókilderi, qoǵamdyq pikir kóshbasshylary bar.
Lager qatysýshylary bilim úderisine jáne mentorlarmen birge isteletin jumystarǵa tolyq jumyldyrylǵan, olardyń ár kúni, saǵattaryna deıin josparlanǵan. Jastardyń bilim alatyn negizgi baǵyttary: azamattyq qoǵamdy damytý, kásipkerlik daǵdylary, jasyl ekonomıka, kreatıvti ekonomıka jáne jańa medıa salalary.
Qazir lagerdiń birinshi aýysymy ótip jatqanyn esterińizge salamyz. Lager óz jumysyn 3 shildede bastady. Qatysýshylar komandalarǵa jikteldi. Onyń maqsaty – qatysýshylardy bir birimen tanystyrý, psıhologııalyq kedergilerdi joıý, jaıly jaǵdaı qalyptastyryp, ortaq qatynas keńistigin qurý boldy.
12 mentor jobalyq 36 komandanyń startap-jobalaryn ázirlep, bastaý alýyna kómektesedi. Qazir komandalar naryqty aldyn ala zerttep, naqty bıznes úlgilerdi qurýda. Naryqtaǵy qajettilikterdi eskere otyryp, taýarlar men qyzmetterdiń sıpattamasy jasalyp jatyr. Odan bólek, koýchter men mentorlar shyǵarmashylyq, oılaý dızaıny daǵdylaryn jetildirip, jobalardy basqardy jáne kásipkerlik negizderin úıretýde.
Qatysýshylardyń ıdeıalarynyń arasynda qazirgi jumys kezeńinde aǵylshyn jáne qazaq tilderin tıimdi onlaın úırený; múgedekterge arnalǵan kıim tigý; ulttyq taǵam – qurtty daıyndaýdyń jańa úlgisi jáne taǵy basqalary bar.
Qarqyndy bilim úderisine qosa, salaýatty ómir saltyn qalyptastyrý salasyndaǵy jetkeshi jattyqtyrýshylar qatysýshylarmen jumys isteýde, olar kúndelikti orman ishinde júgirip, jalpy damytý jattyǵýlaryn jasaıdy, qýat arttyrý jattyǵýlaryn jasap, ıogamen jáne zýmbamen aınalysady.
Lager jumysy shildeniń sońyna deıin jalǵasady. «Zeren-2019» jazǵy lageriniń úsh aýysymynda 18 - 29 jas aralyǵyndaǵy 600 qatysýshy bilim alatyn bolady. Lagerdiń úsh aýysymyna irikteý 27 mamyr jáne 30 maýsym aralyǵynda www.zerencamp.kz saıtynda ótti. Lagerge qatysýǵa 1000-nan astam ótinish kelip tústi.
Lagerdegi úsh aýysymnyń qorytyndysy boıynsha úzdik 30 joba qarjylandyrylady. Jalpy júlde qory 15 mıllıon teńge.
Jobany QR Aqparat jáne qoǵamdyq damý mınıstrliginiń tapsyrysymen Qazaqstanda Jastar jylyn ótkizýge qatysty Jol kartasy sheńberinde Qazaqstan Azamattyq Alıansy júzege asyrýda.
