Memleket basshysy Nur-Sultan qalasynyń bas alańynda bıyl ekinshi ret uıymdastyrylyp otyrǵan Ulttyq dombyra kúnine arnalǵan saltanatty jıynǵa qatysty. Qasym-Jomart Toqaev elorda turǵyndary men qonaqtary aldynda sóılegen sózinde barsha qazaqstandyqtardy Ulttyq dombyra kúnimen quttyqtap, bul meıramdy rýhanııatqa degen zor qurmet, barshamyzǵa ortaq qundylyqty ulyqtaý dep túsiný kerek ekenin aıtty.
– Qazaq pen dombyra – egiz uǵym. Kúmbirlegen dombyranyń úni batyrlarymyzǵa rýh, aqyndarymyzǵa shabyt bergen. Dombyra árbir qazaqtyń rýhyn kókke kóteretin qundy qazynamyz bolýǵa tıis, – dedi Qazaqstan Prezıdenti.
Memleket basshysy Ulttyq dombyra merekesi jas urpaqtyń dástúrli ónerge degen qurmetin arttyratynyna senim bildirdi.
– «Saryarqa», «Balbyraýyn», «Adaı», «Álqıssa» kúıleri – ulttyq rýhymyzdy kóteretin tańǵajaıyp týyndylar. Dombyranyń pernesinen shyqqan kúıde halqymyzdyń tereń tarıhy bar. Biz atadan balaǵa amanat bolǵan asyl muramyzdy saqtap, qadir tutýymyz qajet, – dedi Qasym-Jomart Toqaev.
Qazaqstan Prezıdenti búginde dombyra búkil Qazaqstan halqyn biriktiretin teńdesi joq mádenı mura sanalatynyn jáne rýhanı jańǵyrý jolynyń negizgi arqaýy ekenin atap ótti. Sondyqtan, bul ulttyq ónerdi keńirek nasıhattaýǵa shaqyrdy.
– «О́ner – ult kelbeti» deıdi dana halqymyz. Barshamyzǵa ortaq qundylyq – dombyrany jan-jaqty nasıhattap, jas urpaqtyń sanasyna sińirý óte mańyzdy. Dombyra aspaby – qaıtalanbas asyl dúnıe. Sondyqtan, mektepte dombyra úırený sabaqtaryn engizý – qajetti ári durys bastama. Sebebi, qazirgi jappaı jahandaný ýaqytynda halqymyzǵa tán biregeı qundylyqtardy jańǵyrta berýimiz qajet, – dedi Memleket basshysy.
Sóz sońynda Qazaqstan Prezıdenti tól mádenıetimizge degen qamqorlyq árqashan memlekettiń aıryqsha nazarynda bolatynyn aıtty.
«Qazaq eli» monýmenti alańynda ótken ulttyq rýhanııatymyzdy dáripteıtin konsert barysynda myńnan astam ónerpaz bir orkestrdeı dombyramen qazaqtyń belgili kúılerin oryndady.
