Áleýmettik jáne ınfraqurylymdyq jobalar sheńberinde júzege asyrylǵan sport kesheni 4 gektarǵa jýyq alańda ornalasqan. Bul zamanaýı eki qabatty ǵımarat sport sharalaryn uıymdastyrýǵa, aýyl turǵyndarynyń deneshynyqtyrý jáne saýyqtyrý jattyǵýlarymen aınalysýyna, sonymen qatar aýqymdy sport jáne mádenı-kópshilik is-sharalar ótkizýge arnalǵan. Jańa keshende shaǵyn fýtbol, basketbol jáne voleıbol jarystaryn uıymdastyrýǵa arnalǵan alańdar bar.
Jańa sport kesheni 160 orynǵa arnalǵan. Sonymen birge munda trenajer zaly, kıim aýystyratyn bólmeler, dýsh bólmeleri, ústel oıyndaryna arnalǵan bólmeler jáne basqa da sport túrlerimen aınalysýǵa arnalǵan bólmeler ornalasqan. Sondaı-aq deneshynyqtyrýǵa, toptyq, ústel jáne basqa da kóptegen oıyndarǵa qajet qural-jabdyqtar bar. «Jaqsylyq qylsań bútin qyl» degendeı, «NCOC» kompanııasy ǵımaratty jıhaz jıyntyǵymen jáne negizgi quraldarmen jabdyqtap berdi.
– Munaıly aýdanynda búgin aıryqsha kún. О́ıtkeni aýdanda alǵash ret osyndaı záýlim keshen ashylýda. Aldaǵy ýaqytta osy sport alańynda jattyqqan jasóspirimder arasynan bolashaq chempıondar shyǵatynyna senimdimin. Biz daryndy balalardyń kásibı sportpen aınalysyp, oıdaǵydaı daıyndyqtardan ótýi úshin qoldan kelgenniń bárin jasaımyz. Jeńis jolyndaǵy jalyndy jigerlerińizge jarqyn jetistik tileı otyryp, barlyq jarystar men saıystarda abyroı bıiginen kórinińizder, – dedi aımaq basshysy S.Trumov keshenniń ashylý saltanatynda.
Jalpy quny 466,187 mln teńgeni quraıtyn sport keshenniń qurylys jumystary 2018 jyldyń mamyr aıynda bastalǵan edi. Bul – búginge deıin Mańǵystaý jáne Atyraý oblystarynda 200-den astam ınfraqurylymdyq jáne áleýmettik máni bar nysandar turǵyzǵan «NCOC» kompanııasynyń balalar men jasóspirimderdiń buqaralyq sportyn qoldaýǵa, aýyl turǵyndary arasynda salamatty ómir saltyn nasıhattaýǵa jáne deneshynyqtyrýdy damytýǵa baǵyttalǵan áleýmettik jobalardy iske asyrýdaǵy taǵy bir qomaqty úlesi.
– Eshbir yntalandyrýsyz jáne tıisti materıaldyq bazany nyǵaıtpaı, sportty damytý jáne joǵary nátıjelerge qol jetkizý múmkin emes. Bul maqsatta óndiris oryndarynyń áleýmettik turǵydan jaýapkershiligi de mańyzdy ról atqarady. Besshoqy aýylynda turǵyzylǵan jańa sport kesheni osyndaı jumystyń aıqyn bir úlgisi bolmaq. Búginnen bastap óńir turǵyndarynyń jaıly jerde sportpen aınalysýyna múmkindik týǵanyna óte qýanyshtymyn. Bul keshenniń jergilikti sportshylarǵa óz sheberligin jetildirýge septigin tıgizetinine jáne osyndaǵy jastardyń úlken jeńister men marapattarǵa ıe bolatyndyǵyna senimdimin, – dedi jańa sport keshenin ashý rásimi kezinde basqarýshy dırektorynyń orynbasary E.Marabaev.
Demek, «Záýlim saraıda sportpen shuǵyldansam ǵoı!» degen besshoqylyq jastardyń armany jaqyndaı tústi deýge bolady.
Mańǵystaý oblysy
