Senator Sársenbaı Eńsegenov jumys sapary aıasynda Atyraý oblysynda bolǵan kezde aımaqtaǵy azamattardy qabyldady. Atyraý qalasynyń turǵyny Qadısha Jaqsylyqova men onyń qyzy II toptaǵy múgedek Qalamqas Súndetovany qabyldaǵan senator kelýshilerdiń ótinishterin tyńdady. Jalpy jeke qabyldaý kezinde turǵyndardan jeńildikke ıe jandardyń páter alýyna kómektesý jáne áleýmettik járdem boıynsha zańnamany jetildirý týraly usynystar tústi.
Senator oblystyq, aýdandyq máslıhat depýtattarymen, jergilikti atqarýshy bılik ókilderimen de kezdesip, Parlament Senatynyń zań shyǵarý qyzmeti jáne atqarylǵan jumystar týraly habardar etti. Sonymen birge, qoldanystaǵy zańdardy jetildirý, máslıxattyń rólin kóterý, saılaý, bıýdjet júıesin jetildirý, jergilikti mańyzy bar máseleler týraly usynystar talqylandy.
S.Eńsegenov Atyraýda ótken Balyq sharýashylyǵy qyzmetkerleri kúni merekelik sharasyna da qatysty. Osy salanyń ardagerleri men qazirgi kezde jumys ister júrgen qyzmetkerlerimen, balyq sharýashylyǵy qoǵamdyq uıym basshylarymen kezdesip, balyq ósirý jáne aýlaýdaǵy ózekti máselelerdi talqylady.
