«Arys qalasyn qalpyna keltirý jumystary aımaqtar arasynda 17 sektorǵa bólingen. Jóndeý jumystaryn júrgizýge bizdiń oblystyń 20 qurylys kompanııasy jumyldyrylǵan. Barlyǵy 186 adam jumys istep jatyr. Shilde aıynyń sońyna deıin barlyq jumystardy aıaqtaýdy josparlap otyrmyz», deıdi oblystyq qurylys, sáýlet jáne qala qurylysy basqarmasynyń basshysy Muhamedısa Álserikov.
Sondaı-aq 2019 jyldyń 9-18 tamyz aralyǵynda Arys qalasynan 150 bala Qyzylorda oblystyq bilim basqarmasynyń «Oblystyq olımpıadalar men qosymsha bilim berý ortalyǵynda» tegin demalady. Balalar úshin psıhologııalyq trenıngter, taýǵa ekskýrsııalar, túrli úıirmeler uıymdastyrylady.
Arys qalasy turǵyndaryna 2800-den astam memlekettik qyzmetshi, bıýdjetten qarjylandyrylatyn mekemeler, qoǵamdyq jáne úkimettik emes uıymdar, kásiporyndar, aksıonerlik qoǵamdar men seriktestikter, sharýa qojalyqtary, jeke kásipkerler men mesenattar qarjylaı kómegin kórsetti.
