Jyldyq ınflıasııa 2026 jylǵy aqpanda boljamdarǵa saı kelip, 11,7%-ǵa deıin tómendegen (qańtarda – 12,2%). Inflıasııanyń barlyq komponenti qarqynnyń tómendep kele jatqanyn kórsetip otyr. Azyq-túlik taýarlary boıynsha baǵanyń ósýi –12,7% (12,9%), azyq-túlikke jatpaıtyn taýarlar boıynsha – 11,6% (11,7%), aqyly qyzmetter boıynsha – 10,8% (12%) boldy.
Degenmen aılyq ınflıasııa 2026 jylǵy aqpanda jedeldep, 1,1%-dy qurady. Bazalyq ınflıasııa aqpanda – 0,8% bolǵan.
Azyq-túliktiń álemdik baǵasy baıaýlap keledi. Máselen, sút ónimderi men qant baǵasynyń tómendegen. Al dándi daqyldar men ósimdik maıynyń álemdik baǵasy ósken.
Reseı Federasııasynda ınflıasııa áli de joǵary, targetke jetý 2027 jyly kútiledi. EO-da baǵanyń ósýi turaqty túrde tómen bolyp qalyp otyr. AQSh-ta ınflıasııa federaldy rezerv júıesiniń saralanǵan saıasaty jaǵdaıynda nysanaǵa jaqyndap keledi.
Ulttyq bank bazalyq mólsherleme boıynsha sheshimder kestesin bekitti
«Bazalyq ssenarıı aıasynda birinshi jartyjyldyqta Brent markaly munaıdyń baǵasy Taıaý Shyǵystaǵy qaqtyǵystyń órshýine baılanysty saqtalyp otyrǵan joǵary baǵalar aıasynda burynǵy alǵysharttardan ýaqytsha joǵary bolatyny boljanady. Budan keıin álemdegi suranys pen usynys teńgeriminiń nátıjesinde munaı baǵasy 1 barrel úshin 60 dollarǵa jýyq deńgeıge deıin birtindep tómendeıdi dep boljanady. Boljamǵa sáıkes, 2026 jyly baǵa orta eseppen 1 barrel úshin 66,3 dollardy qurap, keıingi jyldary 60 dollar deńgeıinde turaqtalady», delingen Ulttyq bank habarlamasynda.
Munaıdyń joǵary baǵasyn eskere otyryp, 2026 jylǵa ınflıasııanyń boljamy naqtylanyp otyr. Al baǵalardyń ósýi 9,5-11,5 sheginde baǵalanady. Degenmen, Ulttyq bank Úkimetpen birlesken is-qımyldardy iske asyrý, boljamdy fıskaldyq jáne kvazıfıskaldyq saıasatty qamtamasyz etý, TKQ men JJM-nyń ınflıasııanyń ósýine qosatyn úlesin tómendetý arqasynda baǵanyń ósýi bir mándi deńgeıge jetedi dep kútedi. 2027 jyldyń qorytyndysy boıynsha ınflıasııa 5,5-7,5%-ǵa deıin baıaýlaıdy dep boljanyp otyr. 2028 jyldyń qorytyndysy boıynsha ol 5%-dyq targetke jaqyn qalyptasady.
2026 jylǵa IJО́-niń ósý boljamy 3,5-4,5% aralyǵynda saqtalǵan. 2025 jylǵy joǵary baza aıasynda ekonomıkalyq belsendilik 2026 jáne odan keıingi jyldary birqalypty traektorııada damıtyn bolady. Fıskaldyq shoǵyrlanýdyń jáne tutynýshylyq kredıtteýdiń báseńdeýinen ishki suranys azaıatyn bolady.
«Ulttyq bank ınflıasııanyń baıaýlaý qarqynyn, ishki suranys dınamıkasyn, fıskaldyq shoǵyrlandyrýdyń naqty oryndalýy jáne kvazıfıskaldyq yntalandyrýdy iske asyrý sapasyn baǵalaýdy jalǵastyrady. Sonymen qatar Úkimetpen birlesip, ınflıasııany baqylaý boıynsha sharalardy iske asyrý tıimdiligine jáne TKQ men JJM baǵasynyń ózgerýine monıtorıng júrgiziledi. Inflıasııanyń turaqty baıaýlaýy jáne jańa ınflıasııalyq shoktardyń bolmaýy kezinde 2026 jyldyń ekinshi jartyjyldyǵynda bazalyq mólsherlemeni tómendetý múmkindigi qaralatyn bolady. Qazirgi jaǵdaıda aqsha-kredıt saıasatyn jeńildetý úshin keńistik áli qalyptasqan joq», delingen habarlamada.
