Sport • 22 Shilde, 2019

Denıssiz ótken bir jyl

О́tken juma kúni, ıaǵnı 19 shildede muz ústinde, bar ónerimen kúlli álemdi tamsandyrǵan qazaqstandyq mánerlep syrǵanaýshy, dańqty sportshy ári elimizdiń maqtanyshy Denıs Tenniń bul fánımen qoshtasqanyna da bir jyl toldy. Muzaıdynnyń muzbalaǵy sanalǵan Denıs Ten 25 jasynda qapııada kisi qolynan qaza taýyp, máńgilik saparyna attanǵan edi. Qyrshyn ketken sportshynyń artynda joqtaýshy jankúıeri men qalyń eli qaldy...

Álı BITО́RE

Osydan týra bir jyl buryn Denıs Tenniń Almaty qalasyndaǵy Qurmanǵazy men Baıseıitova kósheleriniń qıylysynda qaskóılerdiń qolynan aýyr jaralanyp, jansaqtaý bólimine túskeni týraly sýyt habar lezde tarap ketti. Elimizde ǵana emes, shetelderde de keńinen tanylyp úlgergen Denıstiń bar álemdegi jankúıeri onyń amandyǵy úshin duǵa tilegen edi. О́kinishke qaraı, Denısti ajaldan arashalaý múmkin bolmady. Bul tek qazaq sportynyń ǵana emes, mánerlep syrǵanaý álemindegi orny tolmas qaza bolatyn... Denıstiń qazasy eshkimdi de beıjaı qaldyrǵan joq. Barsha Qazaqstan halqy namysty ulynan aıyrylyp, qaıǵydan qan jutsa, álemniń ár túkpirindegi jankúıer tanymal sportshydan kóz jazyp qalǵanyna ókindi.

Mıllıondaǵan jankúıer júreginiń tórinen oryn alǵan talantty sportshy Denıstiń qazasynan soń, ony eske alýǵa arnalǵan túrli is-sharalar únemi ótkizilip turdy. Atap aıtar bolsaq, 2018 jyldyń 9 tamyzynda Denıs Tenniń anasy Oksana Ten ulynyń atyn óshirmeý, Denıstiń atynan túrli is-sharalardy ótkizip turý maqsatynda qoǵamdyq qor ashqanyn málimdedi.

2018 jydyń 7 qarashasynda Denıs Tenniń týyp-ósken Almatydaǵy úıine eskertkish taqta ornatyldy. Saltanatty sharaǵa mánerlep syrǵanaýdan Keńes Odaǵynyń jáne Reseı bapkeri, bir kezderi Densıti de jattyqtyrǵan Tatıana Tarasova, Qazaqstannyń halyq ártisi Roza Rymbaeva, reseılik mánerlep syrǵanaýshy, Densıtiń jaqyn dostarynyń biri Elena Radıonova jáne taǵy basqa qurmetti azamattar qatysyp, sportshymyz týraly óz estelikterimen bólisti.

2019 jyldyń basynda Denıstiń jankúıerleri, dostary Almaty qalasynyń ákimdigine Halyq arena muzsaraıyn Denıs Tenniń atyna berý týraly úndeý jasap, onlaın qol jınaýdy bastady. Bir kúnniń ishinde myńǵa jýyq qol jınaldy. Arada alty aı ótse de, muzsaraıy sportshynyń atyna áli kúnge deıin berilgen joq. 13 aqpanda Denıs Ten týraly «Denıs Ten – Velıchaıshee shoý» atty derekti fılm jaryqqa shyqty. Fılm Denıstiń tórtinshi ári sońǵy «Denıs jáne onyń dostary» atty muz aıdynyndaǵy shoýyna daıyndyq týraly baıandaıdy.

22 maýsymda Almatyda Denıs Tenge arnalǵan eskertkish ornatyldy. Eskertkish sportshy qaıtys bolǵan Qurmanǵazy – Baıseıitova kósheleri qıylysyna ornatylǵan. Músinde sportshynyń 2014 jyly Sochıdegi Olımpıadada óner kórsetý sáti beınelengen. Bul Olımpıadada Denıs Ten qola júlde utyp alǵan edi. Eskertkishti Sankt-Peterbýrg músinshisi Matveı Makýshkın jasaǵan.

Sonymen qatar Denıstiń atyndaǵy týrnır Halyqaralyq konkı sporty túrleri federasııasynyń (ISU) kúntizbesine endi. Al 20 shilde kúni Almatyda Qazaqstan jáne álem juldyzdarynyń qatysýymen «Denıs Ten jáne onyń dostary» atty muzdy shoý ótti. Shoýǵa Mao Asada, Elena Radıonova, Tatıana Tarasova, Keıtlın Vıver, Endrıý Poje, Ivan Býkın, Aleksandra Stepanova qatysyp, qalyń jankúıerge óz ónerlerin kórsetti.

Qazaqstannyń mánerlep syrǵanaýdan baı tarıhy men jeńispen órilgen dástúri bolmasa da, el sportshylarynyń bul sportta da joǵary nátıjege talasy bar ekenin Denıs búkil álemge moıyndatty. Sol úshin de Denıstiń aty bizdiń júregimizden məńgi oryn alady.

Kúnniń mańyzdy jáne ózekti jańalyqtaryn «Egemen Qazaqstan» telegram kanalynan oqyńyz