Berekeli istiń basy-qasynda júrgen azamattyń biri – Baqytbek Abatov. Igilikti isti elordada otyryp atqarý qıyn bolǵandyqtan, ol arnaıy aýylǵa kelipti. Buǵan deıingi fýtbol alańyn salý jumystary jeńildeý bolsa, qurylys nysanyn salý áldeqaıda kúrdeli jáne sharýasy kóp. Baqytbek meshitke qajetti qurylys zattaryn satyp alý men jetkizý sekildi túrli sharýalardy tyńdyryp júr.
Meshittiń qurylysy 16 maýsymda bastalǵan. Qazir qabyrǵalary turǵyzylyp, tóbesi jabylǵan. 168 sharshy metrdi alyp jatqan ǵımarat barlyq talaptarǵa saı salynady. Bul úshin aýyldyń janashyr azamattary 9 mln teńge aqsha jınap úlgergen. Qurylys materıaldaryn Nur-Sultan jáne Qostanaı qalalarynan aldyrtý kezinde transporttyq máseleler týyndaǵan. Biraq saýapty iske qarjylaı jáne basqa da úles qosyp jatqan adamdardyń kómeginiń arqasynda jaǵdaı tez retke kelýde. Endigi jumys meshittiń kúmbezin kóterip, ishki jáne syrtqy árleý jumystaryn bitirý.
– Aýylda shamamen myńǵa jýyq adam turady. Jyl saıyn halyq sany kóbeıip keledi. Jastardyń da dinge degen kózqarasy kóńil qýantady. Sondyqtan jurtshylyqqa arnap qulshylyq úıin salýdyń máni zor. Janynda turǵan eski namazhanany jóndep, meshittiń qajetine paıdalaný oıda bar. Onyń bári aldaǵy ýaqyttyń enshisinde. Eń bastysy, kelesi aıda meshitti salyp bitiremiz, – deıdi Baqytbek Abatov.
Qarasýlyqtar osy qarqynyn joǵaltpasa, qyrkúıekke deıin 200 adam syıatyn jańa meshit halyqtyń qoldanysyna beriledi.
Janbolat KENJEǴUL,
«Egemen Qazaqstan»
