«Aqmola oblystyq PD qyzmetkerleri júrgizgen keshendi jedel-izdestirý sharasy barysynda orman sharýashylyǵynyń qyzmetkerlerine shabýyl jasaǵan kúdiktiler ustaldy. Arqalyq qalasynyń 45 jastaǵy turǵyny men onyń 20 jastaǵy balasy polısııadan jasyryný maqsatynda avtokólikten qutylmaq bolǵan. Alaıda, polısııa qyzmetkerleriniń shıraq qımylynyń arqasynda kúdiktiler Qostanaı oblysynyń aýmaǵynda ustaldy», - dep málim etti vedomstvonyń baspasóz qyzmetindegiler.
Osyǵan deıin habarlaǵanymyzdaı, 23 shildede shamamen saǵat 11-de «Ohotzooprom «О́B» RMQK Ortalyq óńirlik fılıalynyń ınspektorlary Aqmola oblysy Jarqaıyń aýdanynda tabıǵatty qorǵaý zańnamasyn buzǵandardyń aldyn alý sharasyn júrgizgen jáne kıik atý faktisin anyqtaǵan. Zań buzýshylardyń izine túsken eki ınspektorǵa qarsy oq atylǵan. Saldarynan 1976 jylǵy ınspektor kóz jumsa, 1975 jylǵy áriptesi jaralanyp, Jarqaıyń aýdandyq aýrhanaǵa jatqyzylǵan edi.
Osyǵan oraı, arnaıy jedel-tergeý toby qurylyp, kúdiktilerdi ustaý boıynsha keshendi sharalardy qolǵa aldy. Kúdiktilerdi ustaýǵa Jarqaıyń, Esil jáne Jaqsy aýdandarynyń polısııa bóliminiń jeke quramy tartyldy. Patrýldik qyzmet narıadynan kúdiktilerdiń kóligine tuspaldaý berildi. Jarqaıyń jáne kórshi aýdandardyń aýmaǵynda 10 blok beket qoıylǵan bolatyn.
Bul is QR Ishki ister mınıstri men Aqmola oblystyq PD basshysy óz baqylaýyna alyndy. Sonymen qatar, atalǵan oqıǵaǵa baılanysty QR QK 99 babynyń 1 bóligi boıynsha qylmystyq is qozǵalǵan bolatyn.
