Eske sala keteıik, bıylǵy kınojobalar baıqaýy naýryz aıynda bastalǵan. Baıqaýdyń alǵashqy kezeńine elektrondy formatta jalpy sany 323 ótinim kelip tústi. Usynylǵan materıaldardy tekserý nátıjesinde 277 joba Saraptama keńesiniń qaraýyna joldansa, birinshi kezeńniń qorytyndysy boıynsha ssenarııler men ssenarıılik josparlar formatynda usynylǵan 107 joba kelesi kezeńge ótti. Al tolyq qujattar toptamasyn qaraý nátıjesinde 95 joba pıtchıngke qatysý quqyǵyna ıe boldy.
«Sońǵy jyldary ulttyq kıno salasynda birqatar oń ózgerister oryn alsa, bul – sala mamandarymen birlesip atqarylǵan júıeli jumystyń naqty nátıjesi. Memleket qarjysyna túsiriletin týyndylardyń sapasy, mazmundyq tereńdigi men janrlyq áralýandyǵy jyl saıyn artyp keledi. Muny memlekettik qoldaýǵa usynylatyn jobalardy irikteý konkýrsynyń erejelerin jetildirý, talaptardy kúsheıtý, sondaı-aq ashyqtyq pen ádildik qaǵıdattaryn basty nazarda ustaý baǵytyndaǵy jumystyń jemisi dep bilemin. Bıylǵy baıqaý da osy ustanymdarǵa basymdyq bere otyryp jalǵasyn taýyp jatyr. Jas kınogerlerdiń belsendiligin erekshe atap ótkim keledi. Olardyń jobalary tyń ıdeıalarymen, batyl shyǵarmashylyq izdenisterimen erekshelenip, ulttyq kınonyń damýyna jańa serpin berip otyr», dep jazdy Premer-mınıstrdiń orynbasary – Mádenıet jáne aqparat mınıstri Aıda Balaeva Facebook-tegi paraqshasynda.
Ulttyq kınony qoldaý memlekettik ortalyǵynyń Basqarma tóraǵasy Qurmanbek Jumaǵalı ashyq ári ádil irikteýdiń otandyq kınony damytýdaǵy mańyzyna toqtaldy.
«Pıtchıng – baıqaýdyń eń mańyzdy kezeńderiniń biri. Avtorlar jobalaryn Saraptamalyq keńeske tanystyryp qana qoımaı, taqyryptyń ózektiligin, shyǵarmashylyq toptyń kásibı deńgeıi men bolashaq fılmniń áleýetin kórsete alady. Kıno ortalyǵy úshin irikteýdiń barlyq kezeńderiniń ashyq ári ádil ótýi – basty qaǵıdattardyń biri. Bıylǵy jobalar zamanaýı otandyq kınonyń damýyna óz úlesin qosyp, kórermen júreginen oryn alady dep senemin», dedi.
Bıyl basym baǵyttar qataryna otbasy qundylyqtary men urpaq sabaqtastyǵy, tarıh pen mádenı mura, qazirgi zamanǵy eńbek adamynyń beınesi, balalar kınosy, ekologııa, sport men salaýatty ómir salty, sondaı-aq birlik, beıbitshilik pen qoǵamdyq kelisim ıdeıalary engizildi.
Ashyq qorǵaýdyń alǵashqy kúninde qatysýshylar Saraptama keńesine kórkem fılmder sanatyndaǵy jobalaryn tanystyrdy. Úsh kún boıy avtorlar óz jumystaryn usynyp, onyń qorytyndysy boıynsha memlekettik qarjylaı qoldaýǵa, ulttyq fılm mártebesine úmitker jobalarǵa qatysty usynymdar qalyptastyrylady.
Pıtchıngtiń ótkizilý barysy Kıno ortalyǵynyń resmı YouTube-arnasynda tikeleı efırde kórsetiledi.
Aıta keteıik, Kann kınofestıvalinde jasandy ıntellekt kómegimen jasalǵan alǵashqy otandyq kórkem fılmniń jabyq kórsetilimi ótti.
Almaty oblysynda álemdik deńgeıdegi kınopavılon salynyp jatyr.
ALMATY
