Ol kezde, dál osy jerde, Lenın atyndaǵy kolhozdyń Mádenıet úıi sanalatyn eńseli ǵımarattyń aldynda proletarıat kósemderi Lenın men Stalınniń (Keńes Odaǵynyń barlyq buryshyna keń taraǵan «Lenın men Stalın Gorkada» monýmenti - avt.) aıaqtaryn aıqastyryp, bir-birine emine qarap otyrǵan erekshe eskertkish turypty. Ozat kolhozshy Alǵadaı Bókenbaev kókemniń aýdandyq redaksııaǵa kelgen bir sátinde aıtqany: 1953 jyldyń sýyq kókteminde dúnıeden ótken Stalınniń tas músinin ornynan alyp tastaý týraly eki jyldan soń bastalǵan naýqan Uzynaǵashqa da jetedi. Tapsyrma túsýin túskenmen kolhoz basshylary kúndeı kúrkirep nemisti jeńgen qaharly kósemniń tas músinin qulatýǵa júrekteri daýalamaıdy. Aqyry partııa uıymy bas bolyp, tırannyń eskertkishin qalaıda osy túni taıdyrýǵa tas-túıin bekinedi. Partııa «tapsyrysyn» oryndaý ataqty kommýnıst-traktorshyǵa júkteledi. Batyldyq úshin jarty bótelke araq iship, tún jamylyp jalǵyz joryqqa shyqqan ol batyrdyń «kózsiz erligi» sol kún ertesimen-aq jazylmaǵan tarıhqa aınalatynyn eshkim bilmegen! Sóıtse, mańdaıdaǵy qos shamynyń bir kózi ǵana ólimsirep janatyn shynjyr tabandy «DT» traktorymen dittegen jerine úreı qushaǵynda jetken traktorshy temir arqandy Lenınniń moınyna laqtyryp, tas músindi saı tabanyna bir-aq súırep aparyp tastaǵan eken...
Árıne tarıhı sabaqtastyq deýge kelmes, kóp keshikpeı Stalın «ketip», Lenınniń músini ekinshi márte tuǵyryna «yń-shyńsyz» qaıta qonǵan dál sol jerde Er Qarasaı babamyzdyń eskertkishiniń de bir orynǵa eki márte qoıylǵany bar. О́ıtkeni batyrdyń birinshi eskertkishindegi at pen adamnyń tastan qashalǵan músinderiniń kólem-ólshemi esh úılespese de birshama jyl «eskertkish atyn jamylyp turdy». Abyroı bolǵanda, kóziqaraqty azamattar qatelikti túzetti, shúkir. Almatydaǵy atynyń alty qulash súıretilgen quıryǵy jer tiregen, óziniń kerneıdeı qalpaǵy kók tiregen Abylaıhan eskertkishine qaraı-qaraı, «kúńkildeı-kúńkildeı» júrip halyqtyń kózi oǵan da úırendi. Endigi jerde «E-e, ómirde arystandaı aıbarly Abylaıhan men onyń arǵymaǵy osyndaı bolǵan» dep, bul qubylysty jas urpaqtyń sanasyna sińirý ǵana qaldy. Osyndaıda tastan qashasa da, shoıynnan quısa da keıipkerin aınytpaıtyn has sheber, qazaqtan shyqqan tuńǵysh músinshi, Qazaqstannyń halyq sýretshisi Hakimjan Naýryzbaevtyń esimin eske alyp, sheberligine bas shaıqaısyń. «Abaı», «Shoqan», «Jambyl», «Bala Jambyl» eskertkishteri!..
