«Qaýipsizdik sertıfıkaty ne úshin qajet degen suraqqa kelsek. Sebebi búginde ınternette túrli quqyqqa qarsy kontentter kóp, odan bólek bir kúnde myńdaǵan kıbershabýyl jasalady. Internet qaýipterdiń qataryna sýısıdke nasıhattaý, ekstremıstik, terrorıstik qımyldarǵa nasıhattaý jáne basqa da QR zańnamasyna keri áserin tıgizetin kontentter jatady», - dedi Asqar Jumaǵalıev.
Onyń aıtýynsha, qaýipsizdik sertıfıkaty ınternettegi túrli kıbervırýstardan qorǵaıdy.
«Memlekettik qyzmetkerler qaýipsizdik sertıfıkatyn 1,5 jyldan beri qoldanyp keledi. Sońǵy bir aı ishinde qaýipsizdik sertıfıkaty 8 mlnnan astam vırýs belsendiligin anyqtap berdi. Sonymen qatar 130 myńnan astam memlekettik organdar men mekemelerdi kıbershabýyldan qorǵady», -dedi ol.
Vedomstvo basshysy qaýipsizdik sertıfıkatyn uıaly telefonyna ornatqanyn kórsetip, ınternetpen eshqandaı qıyndyq týyndamaǵanyn atap ótti.
«Baılanys sapasyna keletin bolsaq, biz qaýipsizdik sertıfıkatyna baılanysty jabdyqtardy qalypqa keltirý jumystary bastalǵannan keıin, ınternet qol jetimdiliginde keıbir problemalar bolýy múmkin degen aqparatty dereý ornalastyrdyq, biraq olar ýaqytsha sıpatqa ıe. О́zime keletin bolsam, men sertıfıkatty ornattym, eshqandaı qıyndyq týyndaǵan joq», - dedi mınıstr.
Mınıstr Asqar Jumaǵalıev qandaı da bir suraq týyndasa, Memlekettik tehnıkalyq qyzmetke habarlasýǵa keńes berdi.
«Meniń oıymsha, Memlekettik tehnıkalyq qyzmetke júginý kerek, sonda týyndaǵan suraqtar sheshimin tabady», - dedi ol.
