«Aqjaıyq» shıpajaıy atalatyn shaǵyn aýyl turǵyndarynyń kóp jyldan beri qol jetkize almaı júrgen máselesi – jol men kólik qatynasy edi.
– Jol jóndeý máselesi – Terekti aýdanynyń turǵyndary úshin óte mańyzdy taqyryp. О́ıtkeni bizde aýdandyq mańyzy bar joldardyń jalpy uzyndyǵy 288 shaqyrym bolsa, onyń 5 paıyzy ǵana jaqsy, 43%-y qanaǵattanarlyq deńgeıde. Qalǵan 52 paıyzy nashar kúıde. Osy másele aýdan, oblys basshylary tarapynan qoldaý taýyp, 2019 jyly 3 aýyldyń jolyn kúrdeli jóndeýge qarjy bólindi. Sonyń biri – Aqjaıyq shıpajaıy, – deıdi Terekti aýdany ákiminiń orynbasary Qýanysh Sharafýtdın.
Dál qazir jol jóndeý jumysy bastaldy. Merdiger kompanııa «DostyqSpesTrans» JShS jóndeý jumystaryn 3 aı merzimde, ıaǵnı 1 qazanǵa deıin aıaqtaýdy josparlaǵan. Osy maqsatqa 43 tehnıka jumyldyryldy. Joba quny 241 mln teńgege baǵalanǵan.
– Aýyldaǵy eń úlken mekeme bolǵandyqtan, turǵyndar túrli máselemen bizge keledi. Aýylda 462 adam turady. Osy jol máselesin de byltyr aýyldastar birneshe márte kótergen bolatyn. Biz bul ótinishti aýdan basshylyǵyna jetkizdik. Sondaı-aq jergilikti bılik Oral qalasymen aradaǵy avtobýs baılanysyn júıege qoısa, turǵyndardyń taǵy bir talap-tilegi oryndalar edi, – deıdi «Aqjaıyq» shıpajaıynyń dırektory Albert Safýllın.
Shynynda da «Aqjaıyq» shıpajaıy osy attas eldi mekendi «quraýshy» negizgi mekeme ekendigi ras. Aýyl turǵyndarynyń deni osy jerde qyzmet etedi. Byltyr aýyldaǵy bastaýysh mektep ǵımaraty apat jaǵdaıynda dep tanylyp, bilim ordasyna jabylyp qalý qaýpi tóngende, aldymen shıpajaı ákimdigi qol ushyn sozdy. Shıpajaı balansyndaǵy bir ǵımaratty mektepke usynyp, tyǵyryqtan jol tapty. О́ıtkeni mektep jabylsa, aýyldyń kúıi ketetini, turǵyndar jan-jaqqa kóshetini belgili ǵoı. Bastaýysh mektep meńgerýshisi Jańylsyn Mákenqyzynyń aıtýynsha, qazir mektep jańa ǵımaratta tolyq jumys istep tur. Bıyl jańa oqý jylynda mektep-balabaqsha mekemesinde 43 sábı bilim alyp, tárbıelenbek.
«Aqjaıyq» shıpajaıy – bir mezgilde 180 adam demalyp, em alatyn óńirdegi tanymal týrıstik nysan. Munda Qazaqstannyń batysyndaǵy 4 oblys pen Reseıdiń kórshiles aımaǵynan kelýshiler óte kóp. Albert Safýllınniń aıtýynsha, byltyr kelýshiler sany 157%-ǵa ósip, jyl ishinde 3357 adam demalǵan. Ulttyq shıpajaılar qaýymdastyǵy jaqynda «Aqjaıyq» sanatorııin tabıǵı emdik faktorlardy úzdik paıdalanyp otyrǵany úshin «Altyn dıplommen» marapattady.
– Elimizde 200-deı shıpajaı bar, solardyń 70%-y jergilikti emdik-shıpaly sý kózderin paıdalanyp emdeıdi. Mine, osy sanatorıılerdiń arasynda bizdiń Aqjaıyq aldyńǵy orynǵa shyqty, – deıdi Albert Tólegenuly.
Aıtpaqshy, shıpajaı demalýshylary jatatyn 5 qabatty ǵımarat pen emdeý sharalary jasalatyn korpýs arasy 200 metrdeı bos alańqaı eken. Aýa raıynyń sýyq ári qolaısyz kezinde emdelýshiler eki ǵımarat arasyna qınala qatynaıtyn. Endi osy alańqaıda basseın jáne sýmen emdeý kesheni qurylysy bastaldy. Qurylys aıaqtalǵan kezde demalýshylar dalaǵa shyqpaı, ǵımarattan ǵımaratqa óte beretin bolady.
Terekti aýdany – Oral qalasyna jaqyn, Jaıyq ózenin jaǵalaı ornalasqan, turmysy jaıly qonys. Búginde óńir basshysynyń tapsyrmasyna sáıkes, Terekti aýdanyn damytýdyń besjyldyq jospary ázirlengen. «Osy jospar sheńberinde oblys ortalyǵy mańynda ornalasqan 8 eldi mekende jol jóndeý jospary jasaldy» deıdi Terekti aýdany ákiminiń orynbasary Qýanysh Serikuly.
Batys Qazaqstan oblysy
