Buǵan deıin áleýmettik jelide kortejge qatysqan kólikterdiń biri aldyńǵy memlekettik nómirsiz artqa qaraı júrgeni beınelengen vıdeo taraǵan edi.
«Beınematerıaldan belgili bolǵandaı, olar jol erejelerin buzatyndyqtaryn bilip, nómirlik belgilerin sheship tastaǵan. Mercedes-Benz-tiń 1995 jylǵy júrgizýshisi tipti jalǵan nómir salyp alyp kólikti júrgizgen, al BMW avtokóliginiń 1999 jylǵy júrgizýshisi art jaǵymen júrip, aldyńǵy memlekettik nómiri joq basqa kólikterdiń qozǵalysyna kedergi keltirgen. Kez kelgen kólik júrgizýshisi bul jol júrý erejesin qatań buzý ekenin túsinedi. Sondaı-aq, ınspektorlar ózge de ákimshilik zańsyzdyqtardy anyqtady. Artynan birneshe hattama toltyrylatynyn, sonysymen jelide teris jaǵynan tanymal bolatynyn bile tura, osyndaı áreketke baratyn jas jigitterdiń isin túsiný qıyn. Tipti aıyppuldardy tólegennen keıin de barlyǵy maǵlumattar bazasynda qalyp qoıady. Al qujattardyń kelesi tekserisi kezinde mundaı adam ınspektordyń kózine jol qaýipsizdigin buzýshy retinde kórinedi», - deıdi Almaty polısııa departamenti Ákimshilik polısııa basqarmasy patrýldik polısııasynyń mamandandyrylǵan batalonynyń komandıri, polısııa podpolkovnıgi Serikjan Ábjanov.
Mamandandyrylǵan batalon komandıriniń aıtýynsha, ereje buzǵandarmen quqyqtyq túsindirý jumysy júrgizilgen. Olardyń avtokólikteri mamandandyrylǵan turaqta tur. Mercedes-Benz júrgizýshisi 1 jylǵa deıin kólik aıdaý quqyǵynan aıyrylýy múmkin. Is materıaldary sheshim qabyldaý úshin MAÁS-ge jiberildi.
