Saýda mıssııasy barysynda Qazaqstannyń eksporttyq jáne ınvestısııalyq múmkindikteri, sondaı-aq eldegi bıznes júrgizý tártibi, eksporttaýshylar men sheteldik ınvestorlarǵa kórsetiletin memlekettik qoldaý sharalary men jalpy saýda júrgizýdi yntalandyrýdyń túrli quraldary týraly baıandamalar jasaldy.
Is-shara barysynda Qazaqstannyń Túrkııadaǵy Elshisi Abzal Saparbekuly Túrkııa Qazaqstannyń mańyzdy strategııalyq ári basty saýda-ekonomıkalyq jáne ınvestısııalyq seriktesteriniń biri ekenin atap ótti. Ekijaqty saýdanyń 1992 jylǵy 30 mıllıon AQSh dollary kórsetkishinen búgingi tańda 2 mıllıard dollarǵa jetip otyrǵany aıtyldy.
Sonymen qatar qazaqstandyq dıplomat táýelsizdik jyldarynda Túrkııa Qazaqstan ekonomıkasyna 3,8 mıllıard dollar shamasynda ınvestısııa quıǵanyn jáne qazirgi tańda elekonomıkasynyń túrli salalarynda túrik kapıtalynyń qatysýymen 2200-ge jýyq kásiporyn jumys istep jatqanyn aıtty.
Saýda mıssııasy sheńberinde Qazaqstan jáne Túrik kásipkerleri arasynda V2V formatynda ekijaqty kelissózder ótkizilip, sonyń nátıjesinde birqatar qazaqstandyq ónimniń túrik naryǵyna shyǵarylýy boıynsha kelisimderge qol jetkizildi.
Sondaı-aq, is-sharalar aıasynda Túrki saýda-ónerkásip palatasy men Qazaqstan-Túrkııa birikken palatasynyń alǵashqy otyrystary ótkizildi. Ázerbaıjan, Qazaqstan, Qyrǵyzstan jáne Túrkııa múshe bolyp tabylatyn bul palata múshe memleketterdiń kásipkerleri arasyndaǵy ekonomıkalyq baılanysty nyǵaıtýdy jáne eki el arasyndaǵy taýar aınalymynyń ósýin kózdeıdi.
Qazaqstan-Túrkııa birikken palatasynyń alǵashqy otyrysynda Elshi bul palatanyń Qazaqstannyń Tuńǵysh Prezıdenti – Elbasy Nursultan Nazarbaevtyń 2018 jylǵy 13 qyrkúıekte Ankaraǵa jasaǵan sapary barysynda qurylǵanyn jáne eki el arasyndaǵy saýda-ekonomıkalyq, ınvestısııalyq jáne tehnologııalyq yntymaqtastyqty yntalandyrý jáne nyǵaıtýdy kózdeıtinin atap ótti.
Saýda mıssııasyna qazaqstandyq jáne túrik kompanııalarynyń 150-den astam ókilderi qatysty. Sonyń ishinde 30 qazaqstandyq óńdelgen ónim eksporttaýshysy boldy.
