Mashına jasaý el ekonomıkasyn óndiris quraldarymen qamtamasyz etedi, barlyq basqa óńdeý óndiristeriniń, otyn-energetıka, kólik jáne logıstıka, ekonomıkanyń óńdeý sektory jáne aýyl sharýashylyǵy salalarynyń damýyna yqpal etedi.
Sala jasaqtaýshy jáne qosalqy bólshekterdi óndirýden daıyn ónim túrlerin shyǵarýǵa kóshti, atap aıtsaq: teplovozdar, elektrovozdar, jolaýshylar jáne júk vagondary, júk jáne jeńil avtomobılder, avtobýstar, astyq jınaý kombaındary, sorǵy jabdyqtary, lıftiler.
2000 jyldan bastap Qazaqstanda mashına jasaý óndirisiniń kólemi 24 esege artyp, 2018 jyldyń qorytyndysy boıynsha 1,1 trln teńgeni qurady.
M. Pishembaev atap ótkendeı, Jol kartasyn qabyldaý — otandyq mashına jasaý salasy úshin mańyzdy oqıǵa, salany orta merzimdi perspektıvada damytýdyń strategııalyq kórinisi. Qujat úsh kıtke negizdelgen.
Birinshisi — elimizde teńdestirilgen ónerkásiptik saıasatty júrgizýge yqpal etetin «О́nerkásiptik saıasat týraly» Zańnyń qabyldanýy. Memlekettik qoldaý sharalary bir zańda ortalyqtandyrylatyn bolady.
Ekinshisi — Qazaqstan Respýblıkasynyń Indýstrııa jáne ınfraqurylymdyq damý mınıstrligi janynan Qazaqstannyń ónerkásipti damytý qoryn qurý.
Qor bızneske mashına jasaý salasyndaǵy kapıtaldy kóp qajet etetin óndiristerdi damytýǵa jáne mashına jasaýdy qosa alǵanda, óńdeý sektoryndaǵy jobalardy qarjylandyrýǵa múmkindik beredi.
Osyǵan uqsas qorlar birneshe jyldar boıy Reseıde, Belarýste jáne EYDU elderinde sátti jumys istep keledi, olar lızıngtik jobalarǵa jyldyq 1,4% mólsherlemesimen jáne ǵylymı-tehnıkalyq ázirlemeler, eńbek ónimdiligi men ınnovasııalyq ónimderdi arttyrýǵa 1% mólsherlememen zaım beredi.
Úshinshisi — qoldanystaǵy qýattylyqtardy jańǵyrtý, sondaı-aq otandyq kásiporyndardyń eksporttyq áleýetin odan ári arttyrý maqsatynda kásiporyndarǵa salyqtyq preferensııalar engizý.
Mashına jasaýdy damytýdyń Jol kartasyna engizilgen sharalar 2024 jylǵa qaraı óndiristiń jalpy kólemin keminde 2 trıllıon teńgege jetkizýge, bir jumysshyǵa eseptegende eńbek ónimdiligin qazirgi $12 myńnan $24 myńǵa deıin arttyrýǵa yntalandyrady.
«Jol kartasy ónerkásiptiń óńdeý sektorynyń kásiporyndarynyń básekege qabilettiligin arttyrý maqsatynda qabyldandy. Biz Qazaqstannyń ındýstrııalandyrý salasynyń damýyna laıyqty úles qosýǵa daıynbyz», — dedi Qazaqstan mashına jasaýshylar odaǵynyń tóraǵasy.
