QR Úkimetiniń basshysy ortalyqtyń medısına, aýyl sharýashylyǵy, ekologııalyq bıotehnologııa, azyq-túlik jáne óńdeý ónerkásibi salalaryndaǵy perspektıvalyq ázirlemeleri, sondaı-aq, olardy elimizdiń ekonomıkasyna odan ári engizý múmkindikteri usynylǵan zerthanalyq blokty tekserdi.
Elordalyq bıotehnologııa ortalyǵynda túrli baǵyttaǵy 14 zerthana ornalasqan, onda genetıkalyq ınjenerııa, ımmýnologııa, baǵanalyq jasýshalar, adam ulpalaryn qalpyna keltirý, ekologııalyq bıotehnologııa, farmakologııa salasynda zertteýler júrgiziledi.
Ulttyq bıotehnologııa ortalyǵynyń bas dırektory E. Ramanqulov ortalyq mamandary birqatar mańyzdy ǵylymı-zertteý jobalaryn ázirlegenin aıtty.
Nysandy aralaý barysynda baǵanalyq jasýsha zerthanasynyń meńgerýshisi V. Ogaı, ujymdyq paıdalaný zerthanasynyń meńgerýshisi E. Joldybaeva, ósimdikterdiń genetıkalyq ınjenerııasy zerthanasynyń meńgerýshisi Sh. Manabaeva, adam genetıkasy zerthanasynyń meńgerýshisi M. Jabaǵın adam genomıkasy, genetıkasy jáne onyń patogenderi, úı janýarlarynyń genetıkasy, sondaı-aq, ǵylymnyń jańa salasy — genomdyq redaksııalaý salasynda júrgizilgen zertteýlerdiń nátıjelerimen tanystyrdy. Olardyń arasynda — deneniń kúıgen jerlerin emdeıtin jasýshalyq preparattar, bıdaı men kartoptyń jańa suryptary, aýrýlarǵa qarsy vaksınalar, dári-dármekter, dárilik jáne emdeý-profılaktıkalyq preparattar bar.
QR Premer-Mınıstri Asqar Mamın ortalyqty qaraý qorytyndysy boıynsha qoldanbaly jobalardy ázirleýdi jalǵastyrýdy jáne ǵylymı nátıjelerdi kommersııalandyrý sharalaryn kúsheıtýdi tapsyrdy. Bilikti mamandardy daıarlaýǵa erekshe nazar aýdarý qajet.
