Kabar agenttigine Shý oblysy IIBB baspasóz qyzmetiniń ókili málim etkendeı, eldiń burynǵy prezıdenti Almazbek Atambaevtyń úıinen mılısııaǵa qońyraý shalynǵan.
«Oqıǵa ornyna Shý oblysy IIBB jedel tergeý toby attandy. Qosymsha aqparat keıin beriletin bolady», - dedi IIBB ókili.
Sondaı-aq, áleýmettik jelide Atambaevtyń úıiniń mańaıynan túsirilgen vıdeo tarap ketti. Vıdeoda qarýly adamdar bastaǵan atystyń qadrlary kórsetilgen.
Eske salaıyq, buǵan deıin Jogorký Kenesh eldiń eks-prezıdenti Almazbek Atambaevtan tıispeýshilik mártebesin alyp tastaý týraly sheshim qabyldaǵan edi.
Aıta ketý kerek, buǵan deıin Atambaevqa qatysty depýtattar tarapynan taǵylǵan aıyptardy zertteý boıynsha arnaıy depýtattyq komıssııa qurylǵan bolatyn. Komıssııa jumysynyń nátıjesinde eks-prezıdentke 6 bólim boıynsha aıyp taǵý týraly sheshim qabyldandy.
Alaıda Bas prokýratýra komıssııanyń jumysyn zań turǵysynan baǵalaı kele, tek bes bólimdi qaldyrdy.
Osylaısha, Atambaev Qoı-Tash aýylynan jer telimin zańsyz satyp alyp, úı salý, qylmys álemine tanymal Azız Batýkaevty qamaýdan bosatýǵa zańsyz buıryq shyǵarý, «Forým» ǵımaratyn Sýbıhı Parhatıge jalǵan satý, Bishkek qalasynyń Jylý elektr ortalyǵyn qaıta qurý jáne ol úshin kómir satyp alý kezindegi jemqorlyq áreketter boıynsha kúdikke ilinip otyr.
Atambaev osymen úshinshi ret IIM-ge uıymdasqan qylmystyq toptyń jetekshisi A.Batýkaevty bosatý isi boıynsha jaýap alýǵa shaqyrtylǵan. Alaıda ol barmaǵan.
