Elbasy Nursultan Nazarbaev 2019 jyldy Jastar jyly dep jarııalaǵany belgili. Osyǵan oraı, stýdentterdi áleýmettik jáne qoǵamdyq paıdaly qyzmetke keńinen tartýǵa baǵyttalǵan «Áleýmettik stýdenttik kredıt» jobasy bastalmaq. Joba aıasynda joǵary oqý oryndarynyń stýdentteri aqshalaı syıaqy alyp, qoǵamdyq paıdaly jumys nátıjeleri úshin akademııalyq kredıtterdi qaıta esepke ala alady. Máselen, kúndizgi oqý nysanyndaǵy joǵary oqý oryndarynyń stýdentterine 20 saǵat qyzmeti úshin 20 myń teńgege, 50 saǵat qyzmeti úshin 50 myń teńgege deıingi kredıt retinde áleýmettik stýdenttik kredıt túrleri usynylady. Iаǵnı stýdentter volonterler retinde balalar úılerinde, qarttar úılerinde, bilim berý jáne basqa da áleýmettik mekemelerde kómek kórsetedi.
«Áleýmettik stýdenttik kredıt» jobasyn iske qosý 2019 jyldyń qyrkúıek aıyna josparlanǵan, al onyń taqyryptyq modýli Qazvolunteer.kz volonterlerdiń biryńǵaı ınternet platformasynda ornalasady.
Aıta ketelik, volonterlerdiń Qazvolunteer.kz biryńǵaı ınternet platformasyn Aqparat jáne qoǵamdyq damý mınıstrligi men «Ulttyq volonterlik jeli» zańdy tulǵalar birlestigi birlesip ázirledi. Onlaın-platforma qazvolunteer.kz volonterlik qyzmetke qatysýshylardyń ózara is-qımyl tetikterin qurýǵa, Qazaqstannyń eriktileri men eriktiler uıymdarynyń qyzmetin úılestirýge, volonterlik jobalardy, baǵdarlamalardy, aksııalardy aqparattyq qoldaýdy júzege asyrýǵa múmkindik beredi. Platformada kez kelgen adam onlaın-tirkeýden ótip, volonterlik qyzmetke qosyla alady. Qazirgi ýaqytta platformada 1400 erikti, 60-tan astam eriktiler uıymy tirkelgen.
