Álemdik arenadaǵy saıası, rýhanı hám mádenı jahandaný tusynda tuńǵysh ret uıymdastyrylyp otyrǵan forým Azııa elderi arasyndaǵy ádebı-mádenı baılanystardy nyǵaıtý maqsatyn dittep otyr. Jıyn barysynda jahandyq máselelerdiń qalamger shyǵarmashylyǵynda kórinis tabýy jáne jańa zaman adamy obrazynyń kórkem shyǵarmada beınelenýi, klassıkalyq muralarynyń álemdik ádebıettegi róli syndy ádebı máseleler ortaǵa salynbaq. Azııalyq ádebıetke keıinnen enip jatqan postmodernıstik baǵyt, Shyǵys fılosofııasynyń keń óris alýy, batystyq órkenıettiń úlgileri – azııalyq ádebı úderisti jandandyryp otyr. Onymen qosa, Azııa elderiniń ádebıetin jaqyndastyratyn kórkem til bolǵandyqtan, kórkem aýdarma salasy boıynsha halyqaralyq baılanystardyń qarqyndy damýyn júıeleý kerektigi jaıly ortaq bitim de aldaǵy forýmda talqylanbaq.
Qazir azııalyq ádebıette jahandyq ıntegrasııalyq úrdister keńinen qamtylyp, jalpyadamzattyq kórkem mazmundy taqyryptar kóbeıýde. Qalyptasqan túrli ádebı forma men jazýshylyq stıl zamanaýı ádebıettiń qarqyndy damýyna sózsiz úles qosady. Sondaı-aq Azııa elderi aqyn-jazýshylarynyń tili, dili, ulttyq mentalıteti, kózqarasy ártúrli bolǵanymen, ádebıettiń álimsaqtan bergi kózdegen maqsaty da, qaýzaǵan taqyryby da bireý: ol – adam taǵdyry men adamgershilik murat. Qurlyqtaǵy 44 elden keletin azııalyq 100-ge jýyq aqyn-jazýshy men qazaq qalamgerleri bas qosatyn aldaǵy forým álemdik ádebıette «Azııa ádebıeti» uǵymynyń qalyptasýyna sep bolatynyna senemiz.
