Megapolısti damytýdyń basty baǵyttary shaǵyn jáne orta bızneske qoldaý kórsetý ekenin atap ótken ákim halyqtyń úshten biriniń kásipkerlik salada jumys jasaıtynyn basa kórsetti.
Mysaly, qalanyń IО́О́-de ShOB-tiń tabysy 40%-dy jáne qala bıýdjetiniń 60%-yn quraıdy. «Almaty» ÁKK-nyń jumysyn ońtaılandyrý, «Almaty Invest» ınvestısııa ortalyǵyn jáne qalanyń 6 aýdanynda fılıaly bar «Qolday» kásipkerlik ortalyǵyn qurý ShOB-ke qoldaý kórsetýdiń tıimdi sharalary bolyp tabylady.
Sonymen qatar, «Almaty Finance» qarjy kompanııasy jáne ShOB-ke saralanǵan prosenttik ólshemmen, qalanyń ortalyq bóligine 7% , al shet aımaǵyna 2% mólshermen nesıe beretin «Almaty» mıkronesıelik uıymy jumysyn bastady. «Almaty Bıznes-2025» baǵdarlamasy boıynsha kásipkerler bilimderin jetildirýde.
Ákim kásipkerlerge qarjylyq kómekten ózge logıstıkada ınfraqurylymdyq sheshimder arqyly qoldaý kórsetiletinin aıtty. Mysaly, Baıtursynov jáne Qonaev kóshelerindegi velojoldar syzbasyn ózgertý arqyly ShOB-ke qoldaý jasalady, biraq munda velosıpedshiler múddesi esh shektelmeıdi. Baqytjan Saǵyntaev óziniń sózinde keıbir áleýmettik jelini qoldanýshylar ákimdik sheshimine qatysty jalǵan aqparattar taratatynyn atap ótti.
Tımırıazov kóshesi boıyndaǵy BRT alynady, Panfılov kóshesiniń konsepsııasy qaıta qaralady, qorshaýlar qaıtarylady, qala kóshelerindegi kólik jolaqtary joıylady eken degen nebir alypqashpa sózder paıda bolýda. «Maǵan keıbir jýrnalıster keledi, áleýmettik jeliler arqyly osy máselelerge qatysty saýaldar qoıady. Alypqashpa sózderge qulaq túrmeńizder, olar jalǵan ári túkke turmaıdy. Eshteńe jabylmaıdy, ózgermeıdi ári joıylmaıdy. Shyndyqqa janaspaıtyn ósekti taratýshylar haıpqa umtylýshylar», dep atap ótti megapolıs ákimi.
ALMATY
