Qazaqstan Respýblıkasy Prezıdentiniń halyqqa jyl saıynǵy Joldaý jasaý tájirıbesi 1995 jyldan, ıaǵnı jańa Konstıtýsııa boıynsha Memleket basshysyna júktegen mindet retinde engizilgen kezden bastaý alady. Qazaqstan Respýblıkasynyń Tuńǵysh Prezıdenti – Elbasy N.Á.Nazarbaevtyń «Eldiń jaǵdaıy týraly jáne 1997 jylǵa arnalǵan ishki jáne syrtqy saıasattyń negizgi baǵyttary týraly» taqyrybymen jasalǵan alǵashqy Joldaýy 1996 jyldyń qazanynda jaryq kórdi.
Osy kezden bastap, Qazaqstan Respýblıkasy Prezıdentiniń Qazaqstan halqyna Joldaýy jáne ony nasıhattaý men júzege asyrý jónindegi jumystar prosesi ózderiniń dástúrleri men belgili bir rásimderin qalyptastyrdy. «Qazaqstan-2030» strategııasy retinde tanymal bolǵan 1997 jylǵy Joldaýdan bastap, Prezıdent Joldaýy qoǵamdyq sanadaǵy ıdeıalyq-qundylyqtyq kórinisti qalyptastyrýǵa baǵyttalǵan baǵdarlamalyq qujatqa aınalyp keledi.
Sondyqtan Qasym-Jomart Toqaevtyń Qazaqstan Respýblıkasynyń Prezıdenti retindegi alǵashqy Joldaýy qoǵamda úlken úmitpen kútildi.
Memleket basshysynyń baspasóz qyzmeti buǵan deıin bul Joldaý parlamentshilerge, atqarýshy bılik organdaryna, jalpy qoǵam úshin elimizdiń aldaǵy kezeńge arnalǵan maqsattary men mindetterin aıqyndaıtyn nusqaýlyq bolatynyn málimdegen bolatyn.
Syndarly qoǵamdyq suhbat – bul memleket turaqtylyǵynyń negizi, ol óz azamattarynyń ál-aýqatymen qamtamasyz etilýi múmkin. Prezıdent usynǵan «qulaq asatyn memleket» tujyrymdamasy azamattardyń barlyq syndarly suranystaryna jedel jáne tıimdi jaýap berýge, bılik pen qoǵam arasynda turaqty dıalog qurýǵa negiz bolady. Bul úshin halyqpen tıimdi keri baılanys ornatý qajet, sonyń ishinde jergilikti bılik organdarynyń tıimdiligin saralaıtyn saýalnamalar júrgizý de mańyzdy.
Qoǵamdyq pikir almasý – adamdardyń suranystaryna barynsha ashyq jáne shuǵyl jaýap berý. Qazaqstan Konstıtýsııaǵa sáıkes áleýmettik memleket bola otyryp, halyqtyń ál-aýqaty, ásirese onyń áleýmettik álsiz bóligi úshin jaýapkershilikti óz moınyna alady. Osy turǵyda, Elbasynyń ataýly áleýmettik kómek berý júıesin ońaılatý, áleýmettik turǵyn úımen qamtamasyz etý, áleýmettik jaǵdaıy tómen otbasylardan shyqqan balalarǵa kepildendirilgen áleýmettik jıyntyq engizý jónindegi tapsyrmalary barlyq qazaqstandyqtar úshin júıeli qadamdar bolyp tabylady.
Áleýmettik kómek kórsetýdiń naqty ólshemderin belgileý, ony júzege asyrýda memleket-jekemenshik áriptestigi tetikterin tartý osy júıeniń turaqtylyǵynyń kepili bolady.
Ekinshi jaǵynan, shaǵyn jáne orta kásipti qoldaýdyń dáıekti sharalary azamattardyń osy sanattaryna da áser etedi. Mıkro jáne shaǵyn bıznes sýbektilerin tekserýge úsh jyldyq shekteý salý, oǵan kóp balaly analardy tartý áreketi azamattardyń osy sanatyn naryqtyq jaǵdaılarǵa beıimdeýge kómektesedi.
Táýeldiliktiń taralýyn boldyrmaý turǵysynan volonterlik mańyzdy ról atqara alady, Prezıdenttiń 2020 jyldy «Eriktiler jyly» dep jarııalaýy jáne kóbinese shaǵyn bıznes sanatynda usynylatyn áleýmettik kásipkerlikti damytýdy qolǵa alýy kezdeısoqtyq emes.
Sonymen birge Prezıdent Úkimetke barlyq tıimsiz shyǵyndardy joıý jáne kiristerdi ulǵaıtý arqyly qajetti rezervter tabý jóninde naqty mindet qoıdy.
Zarema ShÁÝKENOVA,
Qazaqstan Respýblıkasy Prezıdenti janyndaǵy Qazaqstan strategııalyq zertteýler ınstıtýtynyń dırektory
